Кылтан кынаттанан, сиэлтэн ситимнэнэн

Саха Өрөспүүбүлүкэтин күнүн чэрчитинэн Ф.Потапов аатынан норуот айымньытын дьиэтигэр Амма улууһун уран тарбахтаах маастардарын хамаандалара “Кылтан кынаттанан, сиэлтэн ситимнэнэн” диэн улуустааҕы күрэххэ күөн көрүстүлэр. Бэлиэтээн эттэххэ, бу күрэх эһиил улууспутугар ыытыллыахтаах Олоҥхо ыһыаҕар бэлэмнэнии тэрээһин быһыытынан буолла.

Күөн күрэс үөрүүлээх аһыллыытыгар эҕэрдэ тылын улуус баһылыгын социальнай боппуруостарга солбуйааччы, улуустааҕы Олоҥхо ассоциациятын салайааччыта Нюргуяна Илларионова тириэртэ.

Култуура дьиэтигэр бу күн Күн Дьөһөгөй кылыттан-сиэлиттэн оҥоһуллубут “Кыл сиэл абылаҥа” диэн быыстапка туран, бырааһынньык суолтатын үрдэттэ, дьон-сэргэ сөҕүүтүн махтайыытын ылла.

—Аммабыт улууһугар ыытыллыахтаах Олоҥхо ыһыаҕар бэлэмнэнэн, салааларынан арахсан, күрэхтэри тэрийэммит, дьоммут маастарыстыбаларын үрдэтэбит, айар тутар дьоҕурдарын сайыннарабыт. Бу кылтан-сиэлтэн улуустааҕы күрэхпитин аан бастакыбытын тэрийдибит. Күрэххэ 8 нэһилиэктэн 16 кыттааччы баар.

Хамаанда иккилии киһилээх. Бастакы түһүмэх бэйэни билиһиннэрии, иккис түһүмэххэ икки гына арахсан, тымырдаайы өрүүтүгэр уонна салама хатыытыгар күөн көрүстүлэр. Тоҕо бу көрүҥнэри таллыбыт диэтэххэ, сөрүө, олбох хатыыта элбэх бириэмэни, үлэни эрэйэр. Онон түргэн соҕус ньыма диэммит, бу көрүҥнэри таллыбыт. Дьүүллүүр сүбэни билиһиннэрэр буоллахха, бэрэссэдээтэлинэн Мэҥэ Хаҥаластан кылга, сиэлгэ норуот маастара Саргылаана Иннокентьевна Иванова үлэлиир уонна “Туос тойуга” түмсүү салайааччыта, СӨ норуотун төрүт идэтин маастара Клавдия Алексеевна Новикованы кытта мин бэйэм баарбын.

Биллэн туран, оҥоруу хаачыстыбатыгар, төрүт ньыманы туһаныыга сүрүн болҕомтобутун ууруохпут. Станогу эҥин туһаммакка, тобуктарыгар эбэтэр илиилэринэн хатыахтаахтар. Тымырдаайы өрүүтүгэр быатын-туһаҕын барытын ситэрбит буолуохтаахтар. Аныгыскы күрэхпитин бары сүбэлэһэн баран, туоска ыытыахпыт диэн буолла, — диэн Дария Иванова, Ф.Потапов аатынан Норуот айымньытын дьиэтин ойуулуур-дьүһүннүүр салаатын сүрүн исписэлииһэ, “Сыккыс” уран тарбахтаахтар түмсүүлэрин салайааччыта санаатын үллэһиннэ.

Күрэх түмүгүнэн Соморсун нэһилиэгиттэн Мария Егоровна Трофимова уонна Сардаана Михайловна Попова хамаандалара кыайыылааҕынан таҕыста. Иккис миэстэҕэ – Болугуртан «Арчылаана” түмсүүттэн Ульяна Ивановна Иванова, Ульяна Николаевна Винокурова. Үһүс миэстэ –Амматтан “Сыккыс” түмсүү бэрэстэбиитэллэрэ Галина Гаврильевна Кузьмина, Светлана Михайловна Михайлова.

Лия Яковлева

“Амма олоҕо”