Бэйэбит түөлбэ олоҥхобутун сөргүтэн
Саха уус-уран тылын-өһүн духуобунай баайа, силиһэ, төрдө буолбут олоҥхобутун сүтэрбэт, симэлиппэт сыалтан сир-сир аайы үгүс тэрээһиннэр ыытыллаллар.
Дьааҥыбыт Ийэ олоҥхоһута Дарья Томская-Чайка «Көмүс Мөкүлүкээн» олоҥхотун Боруулаахха бөлөҕүнэн аахпыттарын сырдатабыт. Олохтоох дьаһалта, орто оскуола, уһуйаан, култуура киинэ уонна Токума нэһилиэгин тэрилтэлэрин үлэһиттэрэ сахабыт тылын сүөгэйин-сүмэтин, тылын дэгэтин бэйэлэригэр арыйдылар, киэҥ араҥаҕа таһаардылар.
Тэрээһин саҕаланыан иннинэ саха тылын учуутала, дириэктэри үөрэх чааһыгар солбуйааччы Инна Рязанская Дьааҥы олоҥхотун, олоҥхоһуттарын туһунан кэрэхсэбиллээхтик сэһэргээтэ.
Боруулаах орто оскуолатын үөрэнээччилэрэ, кылаас салайааччыларынаан олоҥхону хайдах көрөллөрүн, ылыналларын сыанаҕа көрдүбүт-иһиттибит.
Бэһис кылаастар «Үс үүт күрүө үрдүнэн көстөр үрүмэччи маҥан аттаах Үрүлү Бэргэн» олоҥхону аныгы технологияны туһанан, анимация ньыматынан тэттик киинэ уһулан, саҥардан таһаардылар (сал. Анна Татаринова, уруһуй учуутала). Алтыс кылаас оҕолоро бииргэ үөрэнэр табаарыстара Айаал Гермогенов суруйбут «Эр санаалаах бухатыыр уонна уонна абааһы уола» олоҥхотун уобарастарын куукулаҕа түһэрэн, тыыннааҕымсытан саҥардан, эмиэ биир сонун сүүрээни бэйэлэригэр арыйдылар (сал. Татьяна Старостина, нуучча тылын учуутала). Сэттис кылаастар Мария Обутова-Эверстова «Саасчаана» үҥкүү либреттоны туруордулар (сал. Яна Стручкова, математика учуутала). Ахсыстар П.П.Ядрихинскай – Бэдьээлэ «Дьырыбына Дьырылыатта уонна Тойон Дьөллүүт» олоҥхотунан театрализованнай дьүһүйүү бэлэмнээн, олоҥхо ис эйгэтин айымньылаахтык арыйдылар, көрөөччү сэҥээриитин ылыллар (сал. Айыына Слепцова, нуучча тылын учуутала). Тохсус кылаас кэрэ куолара, кылаас иһигэр олоҥхо муннугун бэлэмнээн, сүдү айымньыны уруһуйдаан, кустук өҥө кыраасканан кумааҕыга түһэрэн, бэртээхэй экспозиция бэлэмнээбиттэрин кэпсээтилэр (сал. Айсена Юмшанова, история учуутала).
Бэйэбит түөлбэ олоҥхобут сөргүтүллэн, олоҥхолооһун үгэстэрэ үөдүйүүтэ, сайдан иһиитэ – биһиги олоҥхобут сүппэтигэр-симэлийбэтигэр төһүү күүс буолар. Култуура киинин үлэһитэ, СӨ култууратын туйгуна, олоҥхону айааччы Софья Степановна Рязанская суруйбут олоҥхотунан «Эбээлэр олоҥхо ааҕаллар» диэн сонун бырайыак сүрэхтэннэ. «Өркөн өйдөөх, модун күүстээх Улуу Аар тойон уонна Дьулусхан бухатыыр» олоҥхону эбээлэр иэйиилээхтик толорон, кэнчээри ыччакка холобур буоллулар. Ону таһынан олоҥхо кинигэлэрин быыстапката, олоҥхо дьоруойдарын илиинэн оҥоһукка дьүһүйбүттэрин быыстапката тэрилиннэ. Култуура киинин саалатыгар биир кэрэ көстүүлээх олоҥхо муннуга сүрэхтэннэ (худуоһунньук Вера Гермогенова). Онон Томторбут туонатыгар улуу айымньыбыт алмаас таас кырыыларыныы күлүмнүү оонньоото, чаҕылыйа сандаарда.
Боруулаах орто оскуолатын, Токума алын сүһүөх оскуолатын кэлэктиибигэр, үүнэр көлүөнэ ыччаппытыгар, нэһилиэкпит тэрилтэлэригэр, убаастабыллаах эбэлэрбитигэр барҕа махталбытын этэбит! Саргы-дьаалы салаллыннын, соргу-дугуй буолуохтун!
Подробнее: https://вестиверхоянья.рф/article/82956