Һыт-тыа, һыт-тыа, сайын кэллэ!

Тоҕус ый тымныылаах, аҕыс ый хаардаах Сахабыт Сиригэр сайын саҕаланар маҥнайгы күнүн көрсөр – кэтэһиилээх түгэн!

Кыстыгы этэҥҥэ туораан, күөххэ үктэммит үөрүүбүтүгэр Олоҥхо тыйаатыра саха иһитин оҥорор “Көмүлүөк” хампаанньаны  кытта «Сайын кэлиитэ» этно-фэшн дефилени  көрдөрдүлэр.

         Саха иһитэ-хомуоһа уонна таҥаһа уларыйан испитин, майгыннаһар өрүттэрин уонна култуурабыт кэрэһитэ буолалларын Олоҥхо тыйаатырын артыыстара ырыаларынан-тойуктарынан хоһуйан сэһэргээтилэр.

Бу күн “Көмүлүөк” хампаанньа туойунан оҥоһуктарга «ТУОЙ-арт», сахалыы ойуулаах таҥаска «Этно-стиль» уонна киэргэлгэ-симэххэ «Алтан-арт» диэн саҥа хайысхаларын билиһиннэрдэ.

Бу дьоро киэһэҕэ сахалыы моһуоннаах таҥастары, халадаайдары, эр киһи ырбаахыларын, хомуһуолларын тигэр маастардар үлэлэрин дьон дьүүлүгэр таһаардылар. Көрөөччүлэр ураты киэптээх, быһыылаах, тигиилээх, моһуоннаах таҥастары көрөн, сонун идиэйэлэри ыллылар, кэрэлиин алтыстылар уонна сахалыы муода хаһан да суолтатын сүтэрбэтигэр өссө төгүл итэҕэйдилэр, төрүт оһуорбут-мандарбыт бэйэбитигэр олус барсарын бэлиэтээтилэр.