Олоҥхо ыһыаҕар бэлэмнэнии тэтимнээхтик барар
Өймөкөөҥҥө Олоҥхо ыһыаҕын тэрийэр улуустааҕы дириэксийэ салайааччыта Николай Обоюков киин куоракка кэлэн, өрөспүүбүлүкэтээҕи тэрийэр кэмитиэт чилиэннэригэр, министиэристибэлэргэ уонна биэдимистибэлэргэ сылдьан, тирээн турар кэккэ боппуруоһу дьүүллэстэ.
— СӨ тырааныспарын миниистирэ Владимир Сивцевы кытта айан суолларын өрөмүөнүн туһунан кэпсэттибит.
Ол иһигэр Уус Ньаранан сөмөлүөттэр көтөр түгэннэригэр, Томторго диэри дьону тиэйии-таһыы боппуруоһун эмиэ көрдүбүт. Томторго сөмөлүөт түһэр вариана эмиэ таарылынна. Маны таһынан, пассажир ахсаана элбиир түгэнигэр, эбии паромнар үлэлэрин былааннаатыбыт.
Биллэн турар, Олоҥхо ыһыаҕар тыһыынчанан массыына айаннаан кэлиэҕэ. Ол тиэхиньикэни барытын уматыгынан хааччыйыы боппуруоһа — сүрүн сорук. Дьон олоҕор куттал суох буолуутун хааччыйар кэмитиэт салайааччытын солбуйааччы Никита Павловы кытта уматыгы тиэйиини быһаарыстыбыт. Кэпсэтии түмүгүнэн, суол тохтобулларыгар көһө сылдьар ыстаансыйалар туруохтара.
Предпринимательство, эргиэн уонна туризм сайдыытын миниистирин солбуйааччы Максим Прокопьевы кытта ыалдьыттары аһатыы, Тутуу миниистирэ Павел Кылатчановы кытта Көмүс Күрүөҕэ уонна ипподромҥа мустар массыына парковкаларын уонна бабаарына тутуутун туһунан кэпсэттибит. Манна бүддьүөттэн эбии харчы көрүллүөҕэ.
******
Улуустааҕы «Северная заря» хаһыат телеграм-ханаала иһитиннэрэринэн, Галина Петрова салайар Томтордооҕу Власий Кривошапкин аатынан Оҕо ускуустубатын оскуолатын үлэһиттэрэ тэрилтэлэрин дьиэтин иһин-таһын киэргэтэн, сууйан-тараан бэлэмнии сылдьаллар.
Бэс ыйын 10 күнүгэр Дьокуускайтан режиссерскай-постановочнай бөлөх кэлэригэр бэлэмнээн, тыыннаах сибэккилэри олордо сылдьаллар. Сибэкки олордор кулуумбалар эскиистэрин оскуола художественнай кылааһын учуутала Нина Егорова толкуйдаата.
Араас дьэрэкээн ис хоһоонноох кулуумбалары Томтор олохтооҕо Сергей Егоров оҥордо. Оскуола үлэһиттэрэ кырааскалаан, тупсаран биэрэн, нэһилиэк киинигэр турар тэрилтэ дьон болҕомтотун тарта
Томтордооҕу Оҕо ускуустубатын оскуолатыгар Олоҥхо ыһыаҕын тэрийээччилэр кэлэн олохсуйуохтара. Бу дьиэҕэ тэрийээччилэр мунньахтыахтара, күннээҕи үлэ түмүгүн ырытыахтара. Биир тылынан, Оҕо ускуустубатын дьиэтэ Олоҥхо ыһыаҕын тэбэр сүрэҕэ, хорук тымыра ыалдьыттары көрсөргө бэлэм.
******
Бу күннэргэ «Сахаэнерго» АУо энергетиктэрэ Өймөкөөн улууһугар Олоҥхо ыһыаҕын эбийиэктэригэр электричество уотугар холбоон эрэллэр.
«Сахаэнерго» АУо пресс-сулууспата иһитиннэрбитинэн, улахан үлэ 4 кэмпилиэк 760 кВА кыамталаах трансформатор ыстаансыйатын туруорууга барда. Энергетиктэр сэттэ «промежуточнай» дэнэр уонна биир анкернай тирэҕи туруордулар. 400 м СИП проводын таҥнылар.
«Бу күннэргэ биһиги үлэһиттэрбит Олоҥхо ыһыаҕын эбийиэктэрин уокка холбуур үлэни түмүктээн эрэллэр», — диэн бэлиэтээн эттэ «Сахаэнерго» АУо генеральнай дириэктэрэ Гаврил Алексеев.
Сонуннары тистэ Елена Потоцкая.