Өймөкөөн иистэнньэҥнэрэ сарыы ураһа тигиитигэр ылыстылар

Биология билимин хандьыдаата, СӨ тыатын хаһаайыстыбатын туйгуна, СӨ агропромышленнай комплексын бочуоттаах үлэһитэ, Өймөкөөн улууһугар аҕыйах ахсааннаах норуоттар ассоциациятын, “Ай-Молкээн” НКО бэрэссэдээтэлэ Марианна Таркова уран тарбахтаах иистэнньэҥнэри түмэн, Олоҥхо ыһыаҕар көхтөөхтүк бэлэмнэнэллэр.

Иистэнньэҥнэр Н.М. Заболоцкай-Чысхаан аатынан кыраайы үөрэтэр түмэл балаҕаныгар мустан, эбээн норуотун түһүлгэтигэр анаан ураһа тигэ сылдьаллар.

— Биһиги ыһыахха эбээн норуотун түһүлгэтигэр туруохтаах сарыы ураһаны тигэбит, — диэн сэһэргиир Марианна Дмитриевна. – Бырайыагы былырыын күһүн култуура эйгэтин үлэһиттэрин кытта толкуйдаабыппыт, аата “Эвенское стойбище на Полюсе холода” диэн.

Ураһаны тэҥэ таба бырааһынньыктааҕы киэргэлэ (нагдалаан) баар буолуохтаах.

Ураһа иэнэ 24 квадратнай миэтэрэ буолуохтаах, аллараа өттө ханнык баҕарар матырыйаал буолуон сөп, оттон үөһэтэ хайаатар даҕаны сарыы буолуохтаах. Иистэнньэҥнэр ураһаны эбээн норуотун ытык-мааны кырдьаҕаһа Ульяна Алексеевна Громова киэбинэн оҥоро сылдьаллар.

– Бу ытык кырдьаҕас удьуор табаһыттар сыдьааннара, бэйэтэ маннык ураһаҕа төрөөбүт-үөскээбит киһи. Инньэ гынан кини кыһыл илиитинэн тириилэрин сарыылаан, тутан-хабан сатабыллаахтык оҥорор, кыбытык ньыматын туһанар.

Сарыыны СӨ “Сахабулт” национальнай концернтан атыыластыбыт. Таба тириитин сарыылааһыны кинилэр муус устар бүтүүтүгэр саҥа саҕалаабыттара, онон хойутааһын буолла. Матырыйаалбыт кэлэн, бу нэдиэлэттэн ураһабыт үөһээ өттүн оҥорон саҕалаатыбыт, — диэн кэпсээтэ Марианна Таркова.

Любовь Кривошапкина.

 “Хотугу сардаҥа” хаһыат