«Көмүс күрүө» Олоҥхо ыһыаҕар бэлэм

СӨ Бырабыыталыстыбатын бэрэссэдээтэлин солбуйааччы Сергей Местников тэрийэр кэмитиэт уочараттаах мунньаҕын ыытта.

Мунньахха «Саха» НКИХ Өймөкөөҥҥө ыытыллар Олоҥхо ыһыаҕын аһыллыытын уонна сабыллыытын сиэрин-туомун, ыытыллар өрөспүүбүлүкэтээҕи куонкурустары уонна күрэхтэһиилэри уһулан, быһа биэриигэ өрөспүүбүлүкэ олохтоохторугар көрдөрөрүгэр анаан  сибээс уонна интэриниэт лиинньийэлэрэ холбонон, бэлэм буолбуттарын иһитиннэрдилэр.

Уопсайа саха төрүт култууратыгар аналлаах 10 куонкурус 42 хайысханан ыытыллыаҕа. Онно 11 кыайыылаах (Гран-при) олоҥхоһут, оһуохай этээччи, тимир ууһа, хомусчут, фольклор жанрдарын кыттыылаахтара, уус-уран оҥоһуктар маастардара уо.д. а. наҕараадаланыахтара. Маны таһынан, успуорт 8 көрүҥэр уонна ат сүүрдүүтүн үс дистанциятыгар 30 кэмпилиэк мэтээл оонньонуоҕа. Бириистэр — бүддьүөтү таһынан үбү тардыы уонна спонсордар көмөлөрө.

Өймөкөөн улууһугар ыытыллар Олоҥхо ыһыаҕын дириэксийэтин салайааччыта Николай Обоюков бэлиэтээбитинэн, “Көмүс күрүө” этнографическай комплекс эбийиэктэрэ бэлэмнэр.

Елена Потоцкая,

Хаартыска — Николай Обоюков