Олоҥхо ыһыаҕа биэс тыһыынчаттан тахса киһини түмтэ
«Олоҥхо ыһыаҕа – 2023” киэҥ хабааннаах национальнай бырааһынньыкка өрөспүүбүлүкэ оройуоннарыттан, Арассыыйа куораттарыттан уонна тас дойдулартан 5 тыһыынчаттан тахса киһи муһунна.
Ил Дархан Айсен Николаев эрдэ бэлиэтээбитинэн, олоҥхо көмөтүнэн саха норуотун аата аан дойдуга билиннэ.
Олоҥхо ыһыаҕар 80 тахса тэрээһин – “Дугуйа Бөҕө” олоҥхо-испэктээк премьерата, олоҥхо өрөспүүбүлүкэтээҕи марафона, уустар, оһуохайдьыттар, олоҥхоһуттар күрэстэрэ, ат симэҕин көрүүтэ, успуорт национальнай көрүҥнэригэр күрэхтэһии, о.д.а. буоллулар.
200 тахса олоҥхоһут Саха героическай эпоһын толоруу өрөспүүбүлүкэтээҕи куонкуруһугар кытынна. Таатта улууһуттан Алексей Николаев кылаан чыпчаал хаһаайынынан буолла уонна 700 тыһ. солк. сэртипикээти тутта.
Ыччат ортотугар Мэҥэ Хаҥалас оройуонуттан Марфа Федорова кыайыылааҕынан буолла, киниэхэ 300 тыһыынча солк. сэртипикээти бэлэхтээтилэр.
Ыһыах кэмигэр “Өбүгэлэр нэһилиэстибэлэрэ” ат симэҕин эрэгийиэннэр икки ардыларынааҕы V бэстибээлэ ыытылынна. Манна Саха Сириттэн, Тываттан уонна Алтаайтан 15 айар кэлэктиип кытынна. Гран-при лауреатынан Уус Алдан улууһун хамаандата ааттанна уонн 100 тыһыынча солк. сэртипикээти тутта.
Норуот маастардара Мария Петрова, Харитина Гоголева, Прокопий Колодезников уонна Екатерина Бочкарева эр киһи аты миинэригэр кэтэр таҥаһын-сабын толору кэмпилиэгин бэстибээлгэ анаан бэлэмнээбиттэр.
Оһуохайга 88 киһи суруйтарбыт. Кинилэр ийэ дойдуга тапталы хоһуйбуттар. Бүлүү оройуонуттан Каролина Харлампьева кыайан, 100 тыһ. солк. сэртипикээти ылла.
“Эр бэрдэ” күрэхтэһиигэ 12 спортсмен кытынна. Кинилэр биэс көрүҥҥэ күрэхтэстилэр. Абсолютнай кыайыылааҕынан Владимир Михайлов (Таатта) ааттанна. Иккис – Владимир Федоров (Ньурба), үһүс – Михаил Гоголев (Өймөкөөн).
Ат сүүрүүтүгэр 11 хамаанда уонна 24 сылгы кытынна. Бириис уопсай кээмэйэ – 1,66 мөл солк. Абсолютнай кыайыылаах 500 тыһыынча солкуобайы ылла. Бары түһүмэхтэргэ – 3200, 2400 уонна 1600 миэтэрэҕэ сүүрдүүгэ, ону тэҥэ абсолютнайга бастыыр иһин күрэхтэһиигэ бастакы миэстэни Семен Винокуров бааһынай-пиэрмэр хаһайыстыбатын сүүрүк аттара ыллылар. Хаһаайыстыба баһылыга Семен Винокуров – биллэр сылгыһыт Дугуйдан Винокуров аҕата.
1600 миэтэрэҕэ бастакынан Дугуйдан балта, Эрэл атынан 15 саастаах Самаана Винокурова көтүтэн кэллэ.
Эһиил XVII өрөспүүбүлүкэтээҕи Олоҥхо ыһыаҕа Амма улууһугар ыытыллыаҕа.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
СИА. УлусМедиа түһэриилэрэ