Олоҥхо ыһыаҕар «Мэндэ Бухатыыр» олоҥхо-испэктээги көрдөрдүлэр

Олоҥхо ыһыаҕар Үүнэр көлүөнэ тыйаатыра «Мэндэ Бухатыыр» олоҥхону көрдөрдө. Айымньы ааптара — оҕо суруйааччыта Евдокия Иринцеева-Огдо. Испэктээк туруорааччы режиссера — СӨ үтүөлээх артыыската Валентина Якимец, туруорааччы худуоһунньук — СӨ култууратын туйгуна Мария Иванова.

«Мэндэ Бухатыыр» испэктээкили Олоҥхо ыһыаҕар оҕолорго аналлаах түһүлгэҕэ көрдөрдүлэр. Дьон-сэргэ саҥа туруорууну дуоһуйа көрдө-иһиттэ. Манна артыыстар талааннарын араас өттүттэн арыйан, чаҕылыта оонньоттулар. Ол курдук, саха уонна эбээн омук төрүт үҥкүүлэрин үҥкүүлээтилэр, олоҥхо кылыһахтаах  ырыатын-тойугун туойдулар. Маны сэргэ, бииртэн биир киһи эрэ кэрэхсиир бэртээхэй көстүүмнэринэн күлүмүрдээтилэр.

Онон, түмүккэ көрөөччүлэр бука бары ытыстарын хабыллар тыастарын бэлэхтээн, көрдөрүүнү сэргээбиттэрин уонна сөбүлээбиттэрин биллэрдилэр.

Түгэнинэн туһанан, Үүнэр көлүөнэ тыйаатыра «Мэндэ Бухатыыр» оҕо олоҥхотун ааптарын Евдокия Иринцееваны-Огдону норуот суруйааччыта Н.Е. Мординов-Амма Аччыгыйын аатынан литэрэтиирнэй бириэмийэни ылбытынан эҕэрдэлиир.

Ангелина Васильева