«Олоҥхо-батл» саҕаланна
Олоҥхо тоҕо үйэттэн үйэҕэ бэриллэн иһэрий? Кини сырдык идиэйэтэ уонна уус-уран тылын күүһэ норуоту, ыччаты, дьону кэрэҕэ угуйар кыахтаах.
Ол иһин «Саха» НКИХ бэйэтин ханаалыгар “Олоҥхо-батл” диэн интерактивнай куонкуруһу быйыл кыһын ыытан, элбэх киһи сэҥээриитин ылбыта.
Бу телевизионнай күөн күрэс олоҥхону толорор эдэр дьону талааннарын таһаарар, дьоҕурдарын көрөөччү киэҥ дьүүлүгэр билиһиннэрэр. Олоҥхо курдук уустук жанр аныгы кэми кытта сатаан дьүөрэлэһэр кыахтааҕын, сайдар кэскиллээҕин арыйар, дакаастыыр биир бастыҥ бырайыагынан буолла.
Эдэр олоҥхоһуттары киэҥ эйгэҕэ таһаарар, ааттыыр-суоллуур сыаллаах бырайыагы СӨ Бырабыыталыстыба бэрэссэдээтэлин солбуйааччы Сергей Местников көҕүлээн иккис сылын «Саха НКИХ» ханаалыгар аһаҕас эпииргэ көрдөрөр.
Бу дьоһун бырайыагы СӨ тас сыһыаннаһыыларыгар уонна норуоттар дьыалаларыгар министиэристибэтэ уонна Өксөкүлээх Өлөксөй аатынан Норуоттар доҕордоһууларын дьиэтэ өйөөн үп-харчы көрүллэр.
“Олонхо-батл” балаҕан ыйын 23 күнүттэн саха тэлэбиидэнньэтигэр саҕаланна.
Күрэх “Саха Өрөспүүбүкэтигэр 2020-2024 сылларга судаарыстыбаннай уонна дьиҥ таһымнаах тыллары харыстыыр уонна сайыннарар” судаарыстыбаннай бырагыраама чэрчитинэн тэриллэн ыытыллар.
“Олоҥхо-батл” күрэх эдэр олоҥхоһуттар таһымнарын, төһө бэлэмнээхтэрин, тылларын-өстөрүн, билиилэрин-көрүүлэрин тургутар. Ыытааччылар Альберт Капрынов уонна былырыыҥҥы “Олоҥхо-батл” күрэх муҥутуур кыайыылааҕа Анастасия Алексеева. Анастасия олоҥхону ыччат ылынарын, үөрэтэрин, олоҥхолуон баҕарар санаата күүстээҕин дакаастаан турар.
Биэс биэрии устата аһаҕас эпииргэ норуот тылынан уус-уран баайын, сүөгэйин-сүмэтин истиэххит уонна киирсиилэри көрүөххүт. Күрэххэ Өрөспүүбүлүкэ араас улууһуттан 10 толорооччу кытта сылдьар — Арчыман Номоҕон (Таатта), Айта Васильева (Мэҥэ Хаҥалас), Михаил Шамаев (Бүлүү), Спиридианна Николаева (Үөһээ Бүлүү), Станислав Иванов (Мэҥэ Хаҥалас), Диана Петухова (Уус Алдан), Александр Ефремов (Амма), Сандал Прокопьев (Бүлүү), Анна Кириллина (Амма), Альберт Шестаков (Таатта).
Кыайыылаах 500 тыһыынча солкуобайы, оттон “Көрөөччү биһирэбилэ” анал аат хаһаайына 100 тыһыынча солкуобайы уу харчынан ылыахтара.
Саха тылын сүөгэйин-сүмэтин , баай тыллаах олоҥхобутун эккитигэр-хааҥҥытыгар иҥэринэ, “Олоҥхо-батл” күрэҕи алтынньы 21 диэри хас субуота ахсын «Саха» НКИХ ханаалыгар киэһэ 7 чаастан сэргээн көрүҥ, дуоһуйа сынньаныҥ.
Тэрийээччилэр.