Москубаҕа олоҥхо виртуальнай быыстапката туруоҕа

Москуба аатырбыт ВДНХ-тыгар норуоттар култуураларын билиһиннэрэр «Арассыыйа» быыстапка-пуорум тэриллэр. Аһыллыыта ахсынньыга буолар уонна сыл аҥаара үлэлиир.

Саха Сирин истиэндэтин тас өттүгэр алмаас, көмүс киэргэллэр, маастардар уус-уран оҥоһуктара туруохтара. Иһигэр киирдэххэ, култуурабытын уонна туризм салаатын көрдөрөр мультимедийнай витриналар дьэргэйэ көрсүөхтэрэ. Кэлбит дьон олоҥхо виртуальнай быыстапкатын, Чысхааны, Тымныы Оҕуһун, Хаарчаананы кытта билсиэхтэрэ.

80 кв.м. иэннээх павильоҥҥа хаартыскаҕа түһэр сир, саха таҥаһын быыстапката, маастар-кылаастары ыытарга аналлаах уонна саха киинэтин көрдөрөр, сынньанар сирдэр баар буолуохтара.

Өрөспүүбүлүкэ ситиһиилэрин билиһиннэриэхтэрэ, ханнык сирдэргэ турист быһыытынан сылдьыахха сөбүн көрдөрүөхтэрэ, бэл, саха тылын үөрэтиэхтэрэ.

Онон төрүт култуурабытын, түҥ былыргы үгэстэри аныгы технологиялар, креативнай идиэйэлэр нөҥүө дьоҥҥо тиэрдиэхтэрэ.