Ньургун Боотур уруйдуу көрсүөҕэ

Сэтинньи 4 күнүттэн Москубаҕа ВДНХ былаһааккатыгар аһыллар “Арассыыйа” норуоттар икки ардыларынааҕы быыстапкаҕа биһиги өрөспүүбүлүкэбит  “Саха Сирэ –Олоҥхо дойдута” диэн  улахан экспозицияны көрдөрүүгэ туруорар.

Маныаха Саха Сирин павильонугар киириигэ 2 миэтэрэ үрдүктээх, “Уруй-айхал! Нөрүөн-нөргүй!” диэн саҥа таһааран дорооболоһор, төбөтүн уҥа-хаҥас эргитэр  сүүнэ улахан Ньургун Боотур ыалдьыттары уруйдуу көрсүөҕэ.

Бу оҥоһугу косплеер Айаал Федоров “Just Ayaal production” бырайыагын хамаандата оҥордо.

-Ньургун Боотур 3Д моделын оҥорорго тустаах, олоҥхоҕо сыһыаннаах исписэлиистэртэн сүбэлэттэрбиппит. Көстүүмүн аныгытан биэрдибит. Тимир тиһилик хаххатын көмүс курдук дуйдаатыбыт. Кырасыабайдык көһүннүн диэн, сахалыы атрибутикаларынан ситэрдибит: быһахтаах, батастаах, хаппардаах, түөһүгэр харысхал күннээх. Скульптуратын Софрон Степанов оҥордо.

Олоҥхоҕо ойууланарын курдук, хастаабат тиит курдук харалаах, сууллаабыт тиит курдук сотолоох, алта былас дараҕар сарыннаах, халлааны хаххалыыр бэйэлээх Ньургун Боотур бөдөҥ-садаҥ көстүүтүнэн, хамсыыр уратытынан элбэх киһини сэҥээрдиэ, Саха Сирин ситиһиитин, кэлэр кэмҥэ былаанын кэпсиир-кэрэһилиир быыстапканы көрөллөргүгэр угуйуо.