Олоҥхо тыйаатырын артыыстара ХИФУ устудьуоннарын кытта Ойуунускайы аахтылар

Былатыан Ойуунускай төрөөбүтэ 130 сылын көрсө, Хотугулуу-Илиҥҥи федеральнай университет уонна Олоҥхо тыйаатыра «Ойуунускайы ааҕыы» өрөспүүбүлүкэтээҕи күрэҕи кыттыһан ыыттылар.

Санатан эттэххэ, бу күрэх иккиһин ыытыллар, маннык хабааннаах тэрээһин уон сыл анараа өттүгэр ыытыллыбыта. Күрэх сүрүн ирдэбилэ — артыыс уонна устудьуон Ойуунускай айымньытын ааҕаллар.

Кэрэхсэбиллээҕэ диэн, кыттааччылар Ойуунускай хоһооннорун үс тылынан аахтылар: сахалыы, нууччалыы уонна кытайдыы.

Дьүүллүүр сүбэ Саха Өрөспүүбүлүкэтин үтүөлээх артыыһа, Ойуунускай аатынан Судаарыстыбыннай бириэмийэ лауреата Айаал Аммосов салалтатынан үлэлээтэ.

Күрэх түмүгүнэн бастакы миэстэҕэ: «Крым» хоһоону доргуччу ааҕан, Нуучча тыйаатырын артыыһа Рокачева Дарья уонна Хотугулуу-Илиҥҥи норуоттар тылларын уонна култуураларын үнүстүүтүн 3 кууруһун устудьуона Акимова Надежда буоллулар.

Иккис миэстэ: «Татыйык ыллыыра» хоһоону чаҕылхайдык толорон, Саха тыйаатырын артыыһа Иванова Анастасия уонна Хотугулуу-Илиҥҥи норуоттар тылларын уонна култуураларын үнүстүүтүн магистрана Пильникова Анастасия буоллулар.

Үһүс миэстэ: «Таатта үрэх үрдүгэр» айымньыны табыллан толордулар Олоҥхо тыйаатырын артыыһа Тумусова Дайаана уонна ыраах Кытай сириттэн сылдьар филологическай факультет 4 кууруһун устудьуона Хань Инин.

Бу маннык тэрээһиннэр устудьуоннары уонна култуура, ускуустуба эйгэтин үлэһиттэрин сомоҕолуур, саҥа саҕахтары арыйар кэскиллээх буолаллара саарбаҕа суох.

Тэрийээччилэргэ уонна бары кыттааччыларга ситиһиилэри.

Күндү бар дьонум! Улуу Ойуунускайынан сиэттэрэн, үүнүөҕүҥ-сайдыаҕыҥ!

Култуура министиэристибэтин матырыйаалынан.