«Алгыстаах Абаҕа – Олоҥхо дойдута” уруһуй-коллаһы нэһилиэк барыта оҥордо
САССР үтүөлээх артыыһа, норуот ырыаһыта, тойуксут, олоҥхоһут Устин Гаврильевич Нохсоороп киинэ түспүт төрөөбүт түөлбэтигэр, алгыстаах Абаҕа туонатыгар СӨ бастакы Бэрэсидьиэнэ Михаил Ефимович Николаев көҕүлээһининэн «Рисуем все»- бырайыак чэрчитинэн Амма улууһугар биллэриллибит «Олоҥхо сылыгар» анаммыт «Рисуем все» улуустааҕы эстафета салҕанар дьоһун түһүлгэтэ тэрилиннэ.
Биһиги нэһилиэкпитигэр эстафета бэлиэтин тохсунньу 19 күнүгэр Бөтүҥ нэһилиэгиттэн А.Е.Кралин аатынан Абаҕа орто оскуолатын дириэктэрэ Людмила Александрова тутан аҕалбыта. Дьэ бу кэнниттэн Абаҕа оскуолатын үлэһиттэрэ көҕүлээһиммитинэн «Рисуем все» бырайыак эстафетатын тэрээһиннэригэр нэһилиэкпит бары тэрилтэлэрэ, элбэх оҕолоох ыаллара үөрүүнэн көхтөөхтүк кытыннылар.
Эйэҕэс эбэлэрбитин, үөрэнээччилэрбитин, оскуолаҕа киириэн иннинээҕи саастаах оҕолорбутун хабан туран уопсайа бу бырайыакка 265 киһи кыттыыны ылла. Ол курдук эстафета тэрээһиннэрин чэрчитинэн Олоҥхо сылынан нэһилиэкпит бары тэрилтэлэрин хабан «Алгыстаах Абаҕа – Олоҥхо дойдута» диэн уруһуй – коллаж оҥордубут.
Манна тэрилтэлэр үлэһиттэрин олоҥхо үс дойдутугар арааран дьоруойдар фигураларын оҥорон, кырыйан онтон барытын сыһыарталаан олус үчүгэй коллаж буолан таҕыста. Ол курдук, Орто дойду дьоруойдарын, кыылын-сүөлүн, үүнээйитин А.Е.Кралин аат Абаҕа орто оскуолатын коллектива (сал.Л.К.Александрова), К.Туйаарыскай аатынан Абаҕатааҕы сельскай бибилэтиэкэ (сал.К.А.Карманова), “Абаҕа нэһилиэгэ” МТ дьаһалтата (баһылык. М.В.Семенов), почта филиалын (сал.А.Ю.Карпова) үлэһиттэрэ оҥордулар. Үөһээ дойдуну У.Г.Нохсоров аатынан Дохуобунас киинин (сал. Е.С.Яковлева), Абаҕатааҕы участковай балыыһа (сал.Л.В.Белолюбская), И.Я.Строд аатынан ТХПК (сал. В.В.Тимофеев) коллективтара ойуулаатылар. Аллараа дойду дьоруойдарын – Абаҕатааҕы 6 №-дээх Баһаарынай чаас (сал.А.П.Дьячковскай), А.Е.Кралин аат Абаҕа орто оскуолатын эр дьонноро, 10 кылаас үөрэнээччилэрэ олус үчүгэйдик, ис дууһаттан кыһаллан уруһуйдаатылар.
Маны сэргэ «Мааны халадаайы ойуулааһын” диэн маастар-кылааһы эйэҕэс эбэлэрбитигэр, ийэлэрбитигэр анаан уруһуй учуутала Валентина Эверстова ыытта. Арассыыйаҕа биллэриллибит Дьиэ кэргэн сылынан элбэх оҕолоох дьиэ кэргэни уруһуйдатыыга – барыта 6 ыал кыттыыны ылла (Карповтар, Яковлевтар, Третьяковтар, Кармановтар, Ребровтар, Кармановтар). Бу тэрээһини социальнай педагог Екатерина Пермякова иилээн-саҕалаан ыытта.
Аны Сахабыт сиригэр Оҕо сылынан «Дьоллоох оҕо саас» диэн паззл ойууну 7-с кылаас үөрэнээччилэригэр кылаас салайааччыта, эдэр педагог Виктория Борисова уруһуйдатта. Ону сэргэ оскуола саад иитээччилэрэ үс группанан кырачаан оскуолаҕа киириэн иннинээҕи саастаах оҕолору араас темаҕа уруһуйдаттылар. Анал байыаннай дьайыыга сылдьар биир дойдулаахтарбытыгар анаан алгыс тыллаах открытканы оҥорууну оскуола дириэктэрин иитэр үлэҕэ солбуйааччы Валентина Строева салайда.
Ити курдук «Рисуем все» бырайыак тэрээһиннэригэр бары тэрилтэлэр үлэһиттэрэ нэһилиэкпит туһугар олус көхтөөхтүк кыттан үлэлиир – олорор түөлбэбит туһугар олус ыалдьарбытын биллэрдибит. Нэһилиэкпитигэр эстафетаны түмүктүүр тэрээһин У.Г.Нохсоров аатынан Абаҕатааҕы Дохуобунас (сал. Е.С.Яковлева) киинигэр буолла. Нэһилиэкпит баһылыга Максим Семенов эстафета тэрээһиннэрэ ситиһиилээхтик, киэҥ далааһыннаахтык ыытыллыбыттарынан эҕэрдэлээтэ, онтон А.Е.Кралин аатынан Абаҕа орто оскуолатын дириэктэрэ Людмила Александрова эстафета тэрээһиннэрин салайбыт, иилээбит уруһуй учуутала Валентина Эверстованы, социальнай педагог Екатерина Пермякованы, дириэктэри иитэр үлэҕэ солбуйааччы Валентина Строеваны киэҥ далааһыннаах тэрээһиннэри олус үчүгэйдик иилээбиттэрин бэлиэтээтэ уонна П.И.Караканов аатынан Мээндиги орто оскуолатын уруһуй учуутала Виктория Семенованы уонна үөрэнээччилэр лидердэрэ Алия Деляеваны сценаҕа ыҥыран эстафета бэлиэтин дьоһуннаахтык туттарда.
«Рисуем все» бырайыак эстафетатын бэлиэтэ кылгас кэмҥэ барыбытын уруһуй кэрэ эйгэтигэр уһуйда, түмтэ. Тэрээһин түмүгэр мустубут дьон хаартыскаҕа түстүбүт уонна сахалыы сайбаччы таҥнан оһуохайдаатыбыт. Тохсунньу 23 күнүгэр эстафета бэлиэтин дьоһуннаахтык ыаллыы Мээндиги нэһилиэгэр туттардыбыт. Оскуола үлэһиттэрэ көҕүлээһиммитинэн нэһилиэкпит бары тэрилтэлэрэ көхтөөхтүк кытыннылар уонна кэлэр өттүгэр тапталлаах дойдубут, Абаҕабыт, кэнчээри ыччаппыт туһугар бары бииргэ түмсүүлээх буола туруоҕун диэн туран бары уруһуй алыбар кыттыспыт тэрилтэлэрбит үлэһиттэригэр, дьоммутугар – сэргэбитигэр барҕа махтал буоллун.
Валентина ЭВЕРСТОВА,
«Амма олоҕо» хаһыат