«Библионочь» тэрээһинигэр «Нуоҕалдьын кугас аттаах тойон Дьаҕарыма бухатыыр» олоҥхону толордулар
Амма бибилэтиэкэрдэрэ сыллата ааҕааччыларга хатыламмат «киэһэлэри» тэрийэллэр
«Библионочь» диэн бибилэтиэкэ үлэтин атын халыыбынан көрдөрөр Бүтүн Арассыыйатааҕы тэрээһин ыытыллыбыта 12-с сыла буолла. Аахсыйа сыллата кэҥээн, дьон сэҥээриитин ылан, ааҕааччылар биир кэтэһэр күннэригэр кубулуйда.
Күннүк Уурастыырап аатынан Амматааҕы кииннэммит бибилэтиэкэ кэлэктиибэ быйыл даҕаны дьон эрэлин түһэн биэрбэтэ — «Библионочь» киэһэ хойукка диэри бииртэн биир интэриэһинэй бырагырааманан кэлбит дьон болҕомтолорун ылыан ылла.
-Бибилэтиэкэ диэн кинигэ уларсар, ааҕар сир диэн олохсуйбут өйдөбүл үрэллибитэ ыраатта. Аныгы бибилэтиэкэлэр нэһилиэнньэ билиитин-көрүүтүн, сатабылын аныгы ньымалары туһанан сайыннараллар. Быйылгы «Библионочь» ону туоһулуур. Дойдуга дьиэ кэргэн сылын чэрчитинэн ыытыллан тэрээһиммит ааҕар дьиэ кэргэттэри түмтэ, ону тэҥэ кэлбит ыалдьыттар олоҥхо абылыыр, сөхтөрөр тыыныгар куустардылар, кинилэргэ анаан быыстапкалар, остуол оонньуулара, атыы-эргиэн дьаарбаҥкалара буоллулар, ыччаттары бибилэтиэкэ үлэтигэр сыһыарар сыалтан квест-оонньуу, караоке, киинэ көрүүтүн тэрийдибит,- диэн киин бибилэтиэкэ дириэктэрэ Юрий Шишигин сырдатар.
Чахчы, сааскы киэһэ бибилэтиэкэҕэ ыалдьыттыы кэлбит дьон кыратыттан эмэнигэр тиийэ хас биирдиилэрэ бэйэлэригэр сөптөөх дьарыгы буланнар бириэмэлэрин атаардылар. Сайыына Кардашевская уонна Валерий Кириллин «Нуоҕалдьын кугас аттаах тойон Дьаҕарыма бухатыыр» олоҥхоттон быһа тардыыны оонньоон көрдөрбүттэрэ, сахалыы таҥас атыыта, Амма чэйин амсайыы, дьахтар киэргэллэрин оҥорууга үөрэхтэр, Таро хаартынан сэрэбиэй — быһатын, ааҕааччылар чуҥкуйан көрөр диэни билбэтилэр.
Тэрээһин биир умнуллубат түгэнинэн бибилэтиэкэ саамай көхтөөх ааҕааччыларын, кэлэктиип ыытар тэрээһиннэригэр өрүү кыттар дьону бэлиэтээһин буолла.
«Амма олоҕо» хаһыат.