Намнар “Туйаарыма Куо” драма-олоҥхону көрдөрдүлэр
Улуустар норуот күүһүнэн олоҥхо испэктээктэри туруор буолбуттара кэрэхсэбиллээх. Намнар Ойуунускай быйылгы төрөөбүтэ 130 сылын көрсө, үс көстүүлээх «Туналҕаннаах ньуурдаах Туйаарыма Куо» музыкальнай драма-олоҥхону туруоран, Намнааҕы М.К. Аммосов аатынан Култуура уонна духуобунай сайдыы дыбарыаһыгар үрдүк таһымнаахтык көрдөрдүлэр.
Испэктээк доҕуһуолун Нам улууһун Үөдэйиттэн төрүттээх, саха профессиональнай музыкатыгар улахан кылааттаах, Сергей Зверев-Кыыл Уола үҥкүүлэрин барытын ноталаабыт Василий Зырянов суруйбут. Дьиҥэр, 2006 сыллаахха суруллубут эбит. Ол гынан баран, оччолого улахан премьера буолбатах, Саха театрыгар испэктээк быһыытынан тура сылдьыбыт.
Оттон бу олоҥхо-драма бырайыагын ааптара СӨ искусствотын үтүөлээх деятелэ, Үҥкүү национальнай театрын сүрүн дирижера Николай Петров буолар. Испэктээк сүрүн режиссера – алгысчыт Афанасий Федоров, иккис режиссер – Опера театрын режиссера Прокопий Неустроев, сүрүн худуоһунньук – Намтан төрүттээх, Арассыыйа уонна Саха Сирин искусстволарын үтүөлээх деятелэ, Нуучча театрын кылаабынай худуоһунньуга Николай Попов, көстүүм худуоһунньуга – Марианна Оконешникова, сүрүн хореограф-балетмейстер – Мария Сайдыкулова.
— Былырыын баччаларга Николай Петров уонна Дьокуускайга олорор биир дойдулаахтарбыт түмсүүлэрин бырабылыанньатын дьоно бу миэхэ бу бырайыагы кэлэн билиһиннэрбиттэрэ. Кырдьыга, салла санаабыппыт. Ол гынан баран, М.К. Аммосов төрөөбүтэ 125, САССР 100 сылларыгар анаммыт бэлиэ сыл былааныгар киллэрэн, үп көрөн, бу олунньу 10-11 күннэригэр премьерата буолан ааста. Манна даҕатан эттэххэ, Нам улууһа Бэдьээлэ, Буоратай курдук олоҥхоһуттарын киэн туттар. Нам улууһунааҕы Олоҥхо ассоциацията бастыҥ үлэтинэн 500 тыһыынча солкуобай бириэмийэнэн бэлиэтэннэ. Олоҥхобут дьиэтэ 6,5 мөлүйүөн солкуобайдаах өрөспүүбүлүкэ гранын ылла, — диэн сырдатар улуус баһылыга Юрий Слепцов.
Нам улууһун 11 нэһилиэгиттэн кыттыылаах, аҥаардас оркестрга 50-ча музыканнаах «Туйаарыма Куо» олоҥхо-драма талаан норуокка баарын өссө төгүл бигэргэттэ.