Олоҥхо онлайн олимпиадатын түмүгэ
Национальнай кэнсиэпсийэ 35 сыла оруобуна бибилэтиэкэлэр Бүтүн Арассыыйатааҕы “Бииргэ ааҕабыт” аахсыйаларын дэкээдэтигэр түбэһэн, ону сэргэ сиэри-туому, үгэһи, фольклору билэри ирдиир-эрэйэр тэрээһиннэр – оскуола ыһыахтара, Оһуохай күнэ, Ырыа күнэ, Сайылык күнэ, Ньукуолун күнэ – барыта ити кэмҥэ утуу-субуу бэлиэтэнэр буолан, төрүт култуураҕа туһуламмыт Олоҥхо онлайн олимпиадата ыам ыйын 22-27 күннэригэр ыытыллыбыта тоҕоостоох.
Төһө да үөрэх дьылын бүтүүтэ буоллар, 1648 оҕо бэлиэтэнэн, тургутугу оҥорорго холонон көрбүтэ үөрдэр. Итинтэн 1351 үөрэнээччитэ тиһэҕэр диэри толорбут. Туоһу суругун 450-тан тахса эрэ оҕо хачайдаан ылбыт.
Кыттыыны хааччыйыы МО-ларга сүктэриллибитэ. Хомойуох иһин, Дьокуускай уонна куорат тулатынааҕы оскуолалар кыттыбатахтарын да тэҥэ. Ол төрүөтүн бэйэлэрэ: “Биһиэхэ дэриэбинэ курдук буолбатах, үөрэх дьыла бүттэ да, оҕолору сатаан хонтуруоллаабаппыт, ыһыллан хаалаллар”, — диэн быһаардылар. Ол иһин үөрэх дьыла саҕаланна да, кинилэргэ эрэ анаан иккистээн ыытар буоллубут. Онно бу манна кыттыбыттара учуоттаныа. Эрэнэбит, күһүн үчүгэй түмүгү көрдөрүөхтэрэ диэн.
Онон билигин улуустар эрэ саха тылын методхолбоһуктарыгар түмүгү таһаарабыт: I миэстэ – Таатта, II миэстэ – Чурапчы, III миэстэ – Ньурба.
Бу улуустар МО-ларын салайааччыларыгар кэлэр үөрэх дьылыгар Үүнэр көлүөнэлэргэ туһуламмыт пуонда үбүлээбит 16, 14, 12 тыһыынча солкуобай суумалаах сэртипикээттэри уонна Бочуоттаах грамоталарын туттарыахпыт.
Махтал суругунан наҕараадаланаллар: Тааттаттан Ытык Күөл 1-кы №-дээх, Туора Күөл, Чымынаайы, Чурапчыттан улуустааҕы гимназия, Мырыла Соловьевскай, Сылан, Ньурбаттан Чуукаар, Кэбээйиттэн Танара, Сунтаартан политехническай лиссиэй, Түбэй Дьаархан, Горнайтан Кировскай, Амматтан Сулҕаччы, Уус Алдантан Суотту, Ленскэйтэн Бэчинчэ, Орто Наахара, Орто Халыматтан Өлөөкө Күөл оскуолаларыгар олимпиадаҕа кыттыыны тэрийбит учууталлар.
Туоһу суругу туталлар: Үөһээ Бүлүүттэн И. Барахов аатынан 1-кы нүөмэрдээх, Дүллүкү, Горнайтан Бэрдьигэстээх 1-кы нүөмэрдээх, Кэптин, Мэҥэ Хаҥаластан Майа И.Г. Тимофеев аатынан лиссиэйин, Тааттаттан Харбалаах, Чурапчыттан Алаҕар, Бүлүүттэн Тааһаҕар уонна 1-кы, 2-с Күүлэт, Ньурбаттан Марха, Акана, Намтан Түбэ, Дьокуускайтан 12-с нүөмэрдээх оскуолаларыгар олимпиаданы көҕүлээбит учууталлар.
Ити оскуолалар бэрэстэбиитэллэрэ 89142223579 нүөмэр Максыгар учууталлар ааттарын суруйан ыытаарыҥ.
Санатан эттэххэ, бу олимпиада Олоҥхо дэкээдэтин кэмигэр ыытыллар тута тургутуктан атын. Ол сэтинньигэ син биир буолуоҕа.
Оттон бу олимпиаданы, Олоҥхо үһүс Уон сыла биллэриллэн, Олоҥхо ассоциациятын көҕүлээһининэн, Үүнэр көлүөнэ тус сыаллаах пуондататын өйөбүлүнэн бу сыл устатын тухары араас хайысханан барар “Олоҥхо дойдутугар айан” бырайыак чэрчитинэн Национальнай бибилэтиэкэ «Олоҥхо» сайта тэрийдэ. Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура сылларыгар ананар.
Көхтөөхтүк кыттыбыттарга махтанабыт. Өссө да атын тургутуктар, биктэриинэлэр, куонкурустар, олимпиадалар бу платформаҕа ыытыллыахтара, онно оҕолоргутун кытыннарар буолаарыҥ.