Олоҥхо ыһыаҕа аны амтаннаах
Сэтинньи ыйга Кэбээйигэ Муҥха олоҥхото буолбута. Ол туһунан видеоматырыйаалы бэлэмнээн таһаарбыппыт. Ким көрбөтөх бу сигэнэн киирэн көрүөххүтүн сөп: https://vkvideo.ru/video-218062294_456239108
Онно сырыттахпытына, кэбээйилэр туризм өҥөтүн оҥорооччулары кытта “Собо барахсан” диэн гастрономическай тэрээһини ыыппыттара. Астара барыта соботтон этэ: собо кэтилиэтэ, алаадьыта, бөрүөгэ, дыраһааҥката, искэхтээх бэрэски, о.д.а.
Ол көрсүһүүгэ кэпсэппиттэрэ, улуус-улуус аһа-үөлэ төрүкү уратылааҕын, холобура, Кэбээйигэ аҥаардас соботтон эрэ хас да суол бүлүүдэни бэлэмнииллэрин, ол иһин Олоҥхо ыһыахтарыгар аны мантан ыла улуустар астыыр сатабылларын көрдөрөр түһүлгэ түстэниэхтээҕин туһунан.
Ити идиэйэ салгыы сайдан, саас Кэбээйигэ буолбут научнай-методическай кэмпириэнсийэҕэ биир сүрүн боппуруоһунан турбута: «Фольклорбутун, олоҥхобутун, ииспитин-ууспутун сэргэ тоҕо национальнай куукунабытын үйэлээх нэһилиэстибэбит сорҕотун быһыытынан тэҥҥэ туппаппытый, өҥөнү оҥоруу таһымыттан таһаарбаппытый? Бу эмиэ норуоппут барҕа баайа, култуурунай кода, уратыта буолбаат?» диэн. Ити этиини Бырабыыталыстыба бэрэссэдээтэлин солбуйааччы Сергей Местников өйүүрүн биллэрбитэ.
Дьэ, онон үлэ баран, «Туризм и гостеприимство» диэн национальнай бырайыакка сөп түбэһиннэрэн, Олоҥхо быйылгы XIX ыһыаҕар Ил Дархан дьыалаларын салалтатын уонна СӨ бырабыыталыстыбатын өйөбүллэринэн “Саха Сирин улуустарын амтана” («Вкус улусов Якутии») диэн гастрономическай былаһаакка тэриллэр буолла.
Олоҥхо ыһыаҕар анаммыт пресс-кэмпириэнсийэҕэ Саха Сирин норуоттарын кулинарнай нэһилиэстибэлэрин харыстааһыны уонна сайыннарыыны көҕүлүүр бөлөх чилиэнэ Валерия Атласова: «Өбүгэ саҕаттан тиийэн кэлбит былыргы ырысыабынан астанар бүлүүдэлэри биһиги умнубакка астыах, дьоҥҥо-сэргэҕэ хайдах астанылларын билиһиннэриэх уонна тарҕатыах тустаахпыт”, — диэтэ.
Кырдьыга да, Эллэй Боотур саҕаттан сахалар ыһыахха сүрүн болҕомтону аска уураллара, эрдэттэн бэлэмнэнэллэрэ.
Сэбиэскэй да кэмҥэ дьон ыһыахха үчүгэйдик аһаары оҥосторо. Дэлэҕэ Сэмэн Данилов холкуос ыһыаҕын туһунан хоһоонугар суруллубут ырыаҕа ылланыа үһү дуо:
Кытыт сылгы кымыһа
Кырылаччы кутуллар,
Субай, харта сокууска,
Сойон, тупсан тураллар.
Аҕам аһас киһиэхэ
Ас-үөл дэлэй биһиэхэ,
Кэлиҥ, күндү ыалдьыттар,
Көрдөһөбүт ыалдьыттааҥ!
Онон быйыл Олоҥхо ыһыаҕар тиийбит дьон “Саха Сирин улуустарын амтана” былаһааккаҕа сылдьаарыҥ. Кэбээйилэр бэйэлэрэ да ыалдьыттары тото-хана аһатар үтүө үгэстээхтэрин Олоҥхо ыһыаҕар бэлэмнэнэр тэрээһиннэргэ сылдьыбыт дьон бэркэ билэбит.
Кэбээйигэ көрсүөххэ диэри!