Олоҥхоһуттарга саҥа соруктар тураллар
Балаҕан ыйын 21-23 күннэригэр Дьокуускай куорат Үс Хатыҥын аттыгар баар «Ил Эйгэ» диэн комплекска Олоҥхоһуттар өрөспүүбүлүкэтээҕи I форумнара буолан ааста. Ол туһунан информацияны таһаарбыппытын бу сигэнэн киирэн ааҕыаххытын сөп.
Чахчы, устуоруйаҕа киирэр түгэн тосхойдо: хас да көлүөнэ толорооччулар олоҥхону салгыы хайдах сайыннарар туһунан санааларын эттилэр, баар кыһалҕаларын кэпсэттилэр, олоҥхону чинчийэр, тарҕатар, көҕүлүүр, тэрийэр, сүрүннүүр дьоммутун кытта инники былааннары, баар итэҕэстэри ырыттылар.
Олоҥхо үһүс Уон сылыгар ирдэбил да кытаатыахтаах, сорук да улаатыахтаах, таһым да үрдүктүөхтээх. Ол курдук, олоҥхо кинигэлэрэ долбуурга быыллыйа сыппакка, ыччат ааҕарын ситиһиэхтээхпит. Баҕар, ким эрэ ону оҥоһуу өйүнэн ролик оҥоруо, баҕар, ким эрэ сериал устуо. Быһата, кумааҕы бичигиттэн күннээҕи олох дьиҥнээх көстүүтүгэр көһүөхтээх, тыыннаах тылга кубулуйуохтаах: кыра оҕо көрөр ойуулуга, ыччат сэҥээрэр испэктээгэ, дьон-сэргэ истэр тойуга буолуохтаах.
Аны туран, уонча мүнүүтэ нойосуус үөрэппити ааҕартан аҕыс чаас устата тохтообокко эбэн-сабан этэргэ үөрэниэхтээхпит. Ыытыллар күрэхтэр барыта онно туһаайаллар, сайдан иһэр суолу арыйаллар.
Уонна, сүрүнэ, олоҥхону айар, суруйар ыччаты үөскэтиэхтээхпит: усулуобуйа тэрийэн, өйөөн. көҕүлээн. Ийэ олоҥхоһуттар баар буолаллара, саҥа олоҥхо айыллара уолдьаста.
Итиэннэ олоҥхо нөҥүө норуоттар сомоҕолоһууларын бөҕөргөтүү үлэтэ күүһүрүөхтээх, олоҥхобутун өрөспүүбүлүкэ тас өттүгэр билиһиннэрии далааһына кэҥиэхтээх.
Онно далаһа буолар элбэх: Олоҥхо ыһыаҕа, Олоҥхо тыйаатыра, Олоҥхо ассоциацията, Олоҥхо киинэ, Олоҥхо үнүстүүтэ, Олоҥхо дэкээдэтэ, Олоҥхо күнэ, Олоҥхо кэмпириэнсийэлэрэ, Олоҥхо баттл, Олоҥхо сайтара, Олоҥхо кинигэлэрэ, Олоҥхо стипендията, Олоҥхо биэриилэрэ, Олоҥхо бэстибээллэрэ, Олоҥхо куонкурустара, Олоҥхо оонньуулара уонна оонньуурдара… Эпос норуоттар икки ардыларынааҕы киинэ, толорооччуларбыт, худуоһунньуктарбыт, артыыстарбыт, уустарбыт.