Отон олоҥхото
Алтынньы 1 күнэ – Аҕам саастаахтар күннэрэ. Дойдубутугар бу күнтэн кинилэргэ болҕомто ууруллар декадата саҕаланна. Ол чэрчитинэн уонна өрөспүүбүлүкэбитигэр Культура сылынан П.П. Ядрихинскай-Бэдьээлэ аатынан Олоҥхо дьиэтин”үлэһиттэрэТ.К. Ядрихинская аатынан Намнааҕы социальнай-геронтологическай киин аҕам саастаахтарыгар ыалдьыттаан, “Отон олоҥхотун” түһүлгэтин төрүттээтилэр.
Сэбиэскэй тутулга үлэлээн ааспыт кэмнэрин санатар оонньуу ыыттылар, ырыа бэлэхтээтилэр. Олохтоохтору, ыалдьыттары киин дириэктэрэ Инна Сивцева эҕэрдэлээтэ, сарсыардаттан аҕам саастаахтар күннэрэ сэргэхтик саҕаланан бара турарын бэлиэтээтэ.
Ыалдьыттар олохтоохтор ытыстарын тыаһыгар доҕуһуоллатан, “Биир курууска отон” үтүө дьыала хамсааһыныгар кыттыһан, уһаакка куруускалаах отоннорун куттулар.
Тэрээһин сүрүн чааһа – саха норуотун тылынын уус-уран айымньытын саамай үрдүк чыпчаалын, олоҥхону истии буолла. Бастаан дьиэлээхтэр кыттыһан, “Оллоон” фольклор бөлөҕүн кыттыылаахтара Анатолий Охотин, Зоя Петрова биллиилээх олоҥхоһут В.Н. Попов-Бочоох “Үс курдаах Үөлэн Кыырдьыт” олоҥхотуттан быһа тардыыны аахтылар.
Ол кэнниттэн олоҥхоһуттар өрөспүүбүлүкэтээҕи күрэхтэрин элбэх төгүллээх кыттыылааҕа Сайдам Айар Кыдаана Арылхан кыыһа Н.В. Москвитин “Хаан Дьаргыстай” олоҥхотуттан быһа тардыыны ааҕан саҕалаата. Уутугар-хаарыгар киирэн, көрөөччүлэр “Ноо!” биһириир тылларыгар тэптэрэн, балачча уһуннук толордо. Мустубуттар олоҥхону олус сэҥээрэ иһиттилэр, тэрийээччилэргэ махтаннылар.
Ыалдьыттар Махтал суругу уонна уһааттаах отоннорун НСГ киин тэрилтэтигэр туттардылар. Кинилэр биллиилээх олоҥхоһут, норуот ырыаһыта П.П. Ядрихинскай-Бэдьээлэ үбүлүөйдээх 125 сылыгар анаммыт “Отон олоҥхотун” тэрээһинин иһинэн ыытыллар “Биир курууска отон” үтүө дьыала хамсааһына декада түмүктэниэр – алтынньы 10 күнүгэр диэри — ыытылларын иһитиннэрдилэр.
Касьян Олесов-Олук, киин волонтера.