Баҕа баар буоллаҕына…

Афанасий Собакин “Дьулуруйар Ньургун Боотур” олоҥхоттон толорорун сэҥээрэн көрүҥ (ити үөһэ хара экран холбонорун күүтүҥ).

Афанасий туһунан кылгастык сырдатар буоллахха, кини “Баҕа баар буоллаҕына, барытын баһылыахха сөп” диэн этии оруннааҕын  бэйэтин холобурунан көрдөрө сылдьар дьулуурдаах киһи.

Дьиҥэр, математика уонна информатика учуутала идэлээх. Ол эрээри биирдэ соһуччу култуура эйгэтигэр кэлэн хаалан, билигин аны сыанаттан түспэт, оннооҕор тэлэбиисэргэ кытта көстөр буолла: «Олоҥхо-баттлга» күрэхтэһэ сылдьар.

Талаана хайдах эмискэ арыллан хаалбыт төрүөтүн түөрдэххэ, хамсыктан харантыыннаах 2021 сыллаахха Афанасийы төрөөбүт Чөркөөҕөр кулууп дириэктэринэн аныыллар. Бука, ырыаһыттар сыдьааннара дьүрүлгэ-муусукаҕа син тыыппалааҕа буолуо дии санаатахтара. ⁠ Уонна сыыстарбатахтар эбит.

 -Ийэм өттүнэн эһэм Прокопий Николаевич Сивцев кылыһахтаах тойуксут, оһуохай тылын этээччи, олоҥхоһут, бэйэтэ ырыа айар киһи этэ. Оттон аҕам өттүнэн эһэм Афанасий Иванович Собакин Таатта улууһугар биллэр ырыаһыт этэ. Аҕам Иван Афанасьевич сыана бэтэрээнэ, 45-c сылын ыллыыр.

Оскуолаҕа Матрена Николаевна Вырдылина салайбыт драма куруһуогар олоҥхо сүрүн дьоруойдарын оонньуур этим. Ол иһин олоҥхолоон көрөргө санаммытым. Култуура эйгэтигэр кэлбит киһи тугу эрэ сатыахтаах буоллаҕым дии. Бастаан биир дойдулааҕым П.Е. Решетников-Көһөҥө Бүөтүр “Уордайа Хаан бухатыырын” үөрэппитим. «Көһөҥө ситим-2» бөлөҕү салайар Туйаара Владимировна Яковлева хас биирдии персонаж ырыата хайдах толорулларын билиһиннэрбитэ. Онтон аны Дьохсоҕоҥҥо көспүтүм. Онно өрөспүүбүлүкэҕэ биллэр олоҥхоһут, Олоҥхо ыһыаҕын Кылаан чыпчаала буолбут Афанасий Николаевич Попов уһуйбута.  Ойуунускай «Дьулуруйар Ньургун Боотурун» толорор буолбутум. Кэлин Бүөтүр Оҕотоойоп “Элэс Боотурун”.

 Бу  мин курдук санаа күүһүнэн, баҕа өттүнэн дьарыктанар эдэр толорооччулар санаа атастаһар түһүлгэлэрэ баара буоллар, элбэххэ үөрэниэ этибит, аҥаардас күрэх эрэ буолбакка, — диэн Афанасий Собакин сэһэргиир.

Видеоҕа М.Соргу устуута.