Харатаай олоҥхотунан испэктээк

Олоҥхоһут Василий Осипович Каратаев-Баһылай Харатаай быйыл төрөөбүтэ 100 сыла. Икки сыллааҕыта Олоҥхо дьиэлэрин айар бырайыактарын өйөөһүҥҥэ Саха Өрөспүүбүлүкэтин судаарыстыбаннай бүддьүөтүн субсидиятын чэрчитинэн үбүлээһиҥҥэ бырайыак көмүскээн, Култуура сайдыытын уонна норуот айымньытын оройуоннааҕы киинэ В.О. Каратаев «МОДУН ЭР СОҔОТОХ» олоҥхотунан испэктээк туруорбутта.

Премьерата 2024 cыл ахсынньы 12 күнүгэр Бүлүү куоратын М.Н. Жирков аатынан Култуура дыбарыаһыгар буолбута. Улууспут олоҥхону толоруунан дьарыктанар оҕолоро түмсэн оонньообуттара.

Туруораачы-режиссера – СӨ култууратын туйгуна Алена ИВАНОВА, экран худуоһунньуга – СӨ үөрэҕириитин туйгуна Ольга ПАВЛОВА, тыас-уус, уот-күөс режиссердара – СӨ култууратын туйгуна Сергей САВВИНОВ уонна Виктор АЛЕКСЕЕВ, худуоһунньук – Иван ВАСИЛЬЕВ, литературнай эрэдээктэр – СӨ култууратын туйгуна Мария ИВАНОВА, фольклор уонна этнография консультана – Тамара КУЛАНОВА, режиссер көмөлөһөөччүлэрэ – Иннокентий НИКОЛАЕВ, Алина ПОСКАЧИНА, таҥас-сап худуоһунньуга –Аида ПРОТОПОПОВА.

 Уус-уран салайааччы – СӨ култууратын туйгуна Светлана ИВАНОВА. Бырайыак координатора –СӨ култууратын үтүөлээх үлэһитэ Надежда ИВАНОВА.

 Олоҥхо-испэктээги туруорууга улуус фольклорнай бөлөхтөрө бары кытыннылар: Халбаакы П.И. Быканов аатынан орто оскуолатын «Дьүрүскэн» бөлөҕө (уһуйааччылар С.Н. Петрова, И.Е. Николаев), Тааһаҕар Н.Н. Каратаев аатынан орто оскуолатын «Үрүмэччи» бөлөҕө (уһуйааччы М.Е. Григорьева), Бүлүү куоратын Г.С. Донской аатынан 2-с N-дээх орто оскуолатын «Өбүгэ утума» бөлөҕө (уһуйааччылар И.П. Докторова, В.С. Николаев), М.Н. Жирков аатынан Бүлүүтээҕи оҕо ускуустубатын оскуолатын Чернышевскайдааҕы филиалын «Далбарай» бөлөҕө (уһуйааччы А.Д. Черкашина), Н.И. Ылахова аатынан Национальнай-култуурунай киин С.Зинурова аатынан «Бүлүү долгуннара» үҥкүү норуодунай ансаамбыла (сал. Г.А.Народова), Култуура сайдыытын уонна норуот айымньытын оройуоннааҕы киинин «ВилДэнс» үҥкүү ансамбыла (сал. Ю.П. Федорова) – барыта 47 оҕо кытынна.

Сүрүн оруоллары толордулар: олонхоһут – Харысхан АНДРЕЕВ (Тааһаҕар), Сир Сабыйа Баай Тойон – Эрчим ГЕРАСИМОВ (Халбаакы), Сир Сабыйа Баай Хотун – Айыына НИКОЛАЕВА (Чинэкэ), Модун Эр Соҕотох – Айаал СУХАНОВ (Тааһаҕар), Туналыкаан Куо – Анита ПРОСТАКОВА (Халбаакы), Айыы Дьаргыл – Сайаана ТЕРЕНТЬЕВА (Халбаакы), Аан Алахчын – Клавдия ГАВРИЛЬЕВА (Халбаакы), Моҕул Кугас ат – Никита АЛЕКСЕЕВ (Бүлүү к.), Харабыл Абааһы – Амелия НИКОЛАЕВА (Чинэкэ), Абааһы кыргыттара – Дайаана НАХОВА (Тааһаҕар), Николина ХАРЛАМПЬЕВА (Чинэкэ), Өксөкү Кыыл, Таас Дьаантаар Дара Буурай – Анатолий ТОМСКАЙ (Халбаакы), Сорук Боллур – Селена САВА (Чинэкэ), Айыына Сиэр Хотун– Сулустаана ЕГОРОВА (Бүлүү к.), Айыы Дьаҥсаар Тойон– Арылхан СЕМЕНОВ (Бүлүү к.).

Кыттааччылар бары анаммыт оруолларын үрдүк таһымҥа толордулар. Олоҥхо-испэктээк ситиһиилээхтик турбутунан Бүлүү улууһун дьаһалтатын социальнай уонна ыччат бэлиитикэтигэр салаатын исписэлииһэ Дайаана ВАРВАРИКОВА, бу бырайыак уонна Култуура сайдыытын уонна норуот айымньытын киинин салайааччыта, СӨ култууратын туйгуна Алена ДАШЕВСКАЯ, Бүлүү улууһун Олоҥхо ассоциациятын уонна олоҥхоһуттар уонна тойуксуттар В.О. Каратаев аатынан кэлэктииптэрин салайааччыта Светлана ИВАНОВА, Бүлүү Г.С.Донской аатынан 2-с N-дээх орто оскуолатын дириэктэрэ Елена НИКОЛАЕВА эҕэрдэлээтилэр. В.О. Каратаев дьиэ кэргэнин аатыттан Ольга Павлова уонна Иосиф Каратаев барҕа махталларын тиэртилэр.

 Бырайыагы олоххо киллэриини өйөөбүт оскуолаларга, айар кэлэктииптэргэ, уһуйааччыларга, чуолаан күн аайы репетицияҕа оҕолору таһарга күүс-көмө буолбут төрөппүттэргэ махталбын тиэрдэбин.

Анна Черкашина,

Бүлүүтээҕи оҕо ускуустубатын оскуолатын Чернышевскайдааҕы филиалын «Далбарай» бөлөҕүн салайааччыта