Дэгиттэр дьоҕурдаах Дьөгүөр
Үөһээ Бүлүү олоҥхоһута Никита Александров-Ынта Микиитэ “Көр Буурай бухатыыр” олоҥхотуттан толорор Егор Никифоров (ити хара экран холбонуо, кыратык күүтүҥ)
Егор Трофимович Никифоров быйылгыттан А.Г. уонна Н.К. Чиряевтар ааттарынан Дьокуускайдааҕы национальнай гимназияҕа үлэлиир. Ол иннинэ Амма улууһун Бөтүҥ Н.Е. Иванов аатынан оскуолатыгар учууталлаабыта. Идэтинэн историк, Саха Сирин устуоруйатыгар лиэксийэ, курс ыытар. Итиэннэ кандидатскайын көмүскээри, диссертация суруйар. Маннык чаҕылхай эр бэрдэ өссө олоҥхо толорорун, хомуска оонньуурун уонна оһуохай тылын этэрин эбэн кэбиһиҥ. Дьэ, дьиҥнээхтик дэгиттэр дьоҕурдаах Дьөгүөр!
Кинилиин 2023 cыллаахха «Олоҥхолоох айан: ноо!» бырайыак чэрчитинэн Аммаҕа сылдьан билсибиппит уонна олус сэҥээрбиппит.
Бастатан туран, Егор төрүкү куорат ыччата. Уонна үөрэҕин бүтэрэн баран, бэйэтэ баҕатынан тыа сиригэр хас да сыл үлэлээн, уопут бөҕөтө ылан кэлбитэ хайҕаллаах.
Иккиһинэн, соһуйуоххут иһин, 13 сааһыгар диэри сахалыы төрүт саҥарбатах оҕо эбит. Дьокуускайга нуучча дьыссаатыгар, кылааһыгар уһуйуллубут. Онтон сэттиһи бүтэрбитин кэннэ, сайын аймахтарыгар Үөһээ Бүлүү Кэнтигэр сайылата ыыппыттар. “Күһүн Кэнтиктэн уу саха буолан кэлбитим”. – диир. Таайдара киниэхэ Чап уустарын удьуора, Кэнтик бастакы кинээһэ Боччойо сыдьаана буоларын кэпсээн, өбүгэтинэн киэн туттуу кыымын сахпыттар уонна, төрүт тылын билэр баҕатын күөртээн биэрэн, сахалыы кутун уһугуннарбыттар. Ол билиитин “бар, кэл, тур” диэн көннөрү кэпсэтии эрэ тылынан хаҥатар кыратын өйдөөн, аны олоҥхо тылынан саҥарарга холоноору, Егор “Кыыс Дэбилийэни” үстэ төхтөрүйэн аахпыт.
Үсүһүнэн, “булгуччу маннык буолуохтаах” диэн хааччахха киирэ илигэ сэҥээрдибитэ: истээччитин кытта биир долгуҥҥа буолаары, кинилэр төһө ылына олороллоруттан сирдэтиннэрэн, олоҥхотун ол тэтиминэн туойара. Ол иһин арыт куолаһа улаатан кэлэр, арыт ырыатын араастаан уһатан-кэҥэтэн дьиэрэтэр. Оттон, дьиҥэр, оннук да буолуохтааҕа буолуо дии. Умнубатарбын эрэ ханнык диэн, бэйэҕэр ботугуруу олордоххо, ким сэҥээриэй? Онон Егор Трофимович абылыыр айылгытынан, ол эбэтэр харизматынан, истэ олорор дьонун кытта ситими олохтуура уонна ону бүтэһигэр диэри тутара кэрэхсэбиллээх.
Кини олоҥхоҕо кэлиитэ да уратылаах. Эбээтэ Александра Макаровна Никифорова хомус тарда үөрэппит. Ахсыска үөрэнэ сылдьан, Альбина Дягтерева “Айархаан” бөлөҕө тэрийбит 10 хонуктаах дьарыгар сылдьаат, уол оҕото Дубайга норуоттар икки ардыларынааҕы куонкуруска тиийэн кыттан, Гран-при буолбут.
Ытыс саҕа ымыыта кинини аны олоҥхоҕо сирдээбит. 2021 с. Өлүөхүмэҕэ Олоҥхо ыһыаҕар хомустуу тиийэн баран, Василина Баланова-Кэрэмэс Лыҥкыры кытта билсэн, кини салайар “Күн сандаар” бөлөҕөр киирэн, аны олоҥхону толоруу абылаҥар куустарбыт.
“Олоҥхолуур буолуохпуттан ыла бэйэбин буллум. Урут наар туох эрэ тиийбэт, туохха эрэ ыксыыр курдугум. Билигин холкубун, сыалбын-сорукпун чопчу билэбин”, — диир Егор Трофимович.
Кини дэйбиирин кытта бэйэтэ оҥосторун истэн сөхтүм. Талаана оннук тахсан иһэр. Билигин «Саха» НКИХ «Олоҥхо-баттл-2026» күрэҕэр кытта сылдьар.
Биллэн турар, репертуарыгар биир эрэ олоҥхолоох буолбатах. Ол эрээри биһиэхэ Көр Буурай бухатыыр туһунан олоҥхону толоро баар буолан, ону билиһиннэрэбит.
Михаил Эверстов Соргу устуута, Анисия Иевлева сырдатыыта.