Бүлүүгэ «Ньургун Боотур» опера туруоҕа

Опера 2024 сыл муус устарыгар көрөөччү дьүүлүгэр тахсара былааннанар. Ол туһунан улуус баһылыга Сергей Винокуров иһитиннэрдэ.

– 2022 сыллаахха ­АЛРОСА тус сыаллаах үбүлээһин дуогабарын үбүттэн улууспут сыанатыгар Саха сиригэр аан бастакынан опера туруорбуппут. Опера диэн – үрдүкү ускуустуба көрүҥэ, аныаха диэри Дьокуускайга эрэ туруоруллара. Биһиги ол чахчыны уларыттыбыт. Кастины идэтийбит артыыстар уонна норуот талааннаахтарын ортотугар ыыппыппыт, кыттыан баҕалаах олус элбэх этэ. Опера – тыйаатыр, балет, вокал… Ылыммыт сыалбытын-сорукпутун ситистибит! «Сыгый Кырынаастыыры» – Бүлүүгэ, Дьокуускайга, оттон быһа тардыылары Москубаҕа туруордубут. Оттон билигин Бүлүүгэ өссө биир киэҥ хабааннаах, дьайыылаах туруорууга ылсан, бу сырыыга «Ньургун Боотурга» ылсан үлэлэһэ сылдьаллар. Кастинг буолбута, ол кэнниттэн эрчиллэн барбыттара. Бу «Ньургун Боотур» туруорууну киэҥ көрөөччү дьүүлүгэр былаан быһыытынан кэлэр, 2024 сыл муус устарыгар таһаарыахтара.

«Кыым» хаһыат суруйуутуттан.