«Оҕо Ньургун» олоҥхоттон Сергей Кладкин

Таатта улууһун Тыараһа нэһилиэгин олохтооҕо Сергей Федорович Кладкин биир дойдулааҕа Сэмэн Собакин-Сэмэтэй “Оҕо Ньургун” олоҥхотуттан быһа тардан толорорун истиҥ.

Сергей Кладкин сааһын тухары сопхуоска үлэлээн, билигин бочуоттаах сынньалаҥҥа олорор. Дьарыга элбэх. Нэһилиэк устуоруйатын үөрэтэр, үйэтитиигэ үлэлэһэр. Уус-уран самодеятельность кыттыылааҕа. Уйбаан Унаарга уһуйуллуоҕуттан ыла ыҥырыыга сылдьар алгысчыт буолла.

Кэнники сылларга аны олоҥхону толорууга холонон эрэр. Эдэр сылдьан сопхуоска бииргэ үлэлээбит ытыктыыр киһитэ Сэмэн Собакин-Сэмэтэй “Оҕо Ньургунун” толорор.

“Сэмэтэй олоҥхолуурун үстэ истэн турардаахпын. Окко биригэдьиирбит этэ. Сылаалаах үлэ кэнниттэн киэһэ отууга олорон, түүннэри олоҥхолуура. Сылайбата, төттөрүтүн, уутугар-хаарыгар киирэн, өссө эрчимирэн биэрэрэ. Илэ кулгаахпынан хайдах толорулларын истибит буоламмын, ырыатын-тойугун матыыбын үтүгүннэрэн таһаарабын”, — диэн кэпсиир.

Олонхо Семена Собакина «Оҕо Ньургун» (фрагмент). Исполняет Сергей Кладкин, Таттинский улус.

Видео создано при поддержке Президентского фонда культурных инициатив.