Ньургун Боотур пааматынньыгын туруорсаллар

Биллэр бэрэпиэссэрбит, өркөн өйдөөх учуонайбыт, ыйан биэрэр суолдьут сулуспут Ульяна Винокурова Дьокуускайга Ньургун Боотур пааматынньыга турарын туруорсан суруйбута бу күннэргэ социальнай ситимнэринэн тарҕанна.

Бу маннык боппуруоһу көтөҕөн, былырыын 2023 сыллаахха “Кыым” хаһыакка Дмитрий Филиппов диэн киһи суруйан турар.  Билигин да дьон санаатын этэр, бары кэриэтэ өйүүллэрин биллэрэллэр.

Оттон бүгүн бу Ульяна Винокурова суругун бэчээттиибит:

“Ханнык эр киһи билиҥҥи кэмҥэ биһирэмнээх холобур буоларый? Тыҥааһыннаах, тыыҥ-тыыҥҥа харбас кэмнэргэ, биллэн турар, Үөһэттэн анаммыт Айыы бухатыырдара Орто дойду эйэлээх олоҕун көмүскүүллэр. абааһылары Аллараа дойдуга үтүйэллэр. Үксүгэр абааһы “төннүөм, иэстэһиэм”  диэн сааныылаах тимирэр. Ол иһин саха дьоно бухатыырдарынан күрүөлэнэн, бу хаар-муус үрүҥ туналга дойдумсах тыынын иитэригэр, көмүскүү сырыттыннар диэн, үтүмэн элбэх олоҥхону айдаҕа.

Олоҥхобут аан дойду харыстыыр айымньыта буолбута номнуо сүүрбэ сыла туолара чугаһаата да, архитектура биир үйэлээх, норуоту биир тыыҥҥа сомоҕолуур Айыы бухатыырын пааматынньыгын туруора иликпит. Атын өрөспүүбүлүкэлэртэн, эрэгийиэннэртэн быдан хаалан иһэбит. Олоҥхо ыһыахтарын эрэ өрө тутабыт.

Онон эпическэй бухатыырга пааматынньыгы Дьокуускайга туруоруу – Олоҥхо 10 сыллаах үһүс кэрдииһин өрөспүүбүлүкэтээҕи былаанын биир сүрүн тосхоло уонна ситиһиитэ буоларыгар бу этиини өйүүргэ ыҥырабын”.