«Туйаарыма Куо» олоҥхо-испэктээк

Былырыын 2023 сыллаахха, Ойуунускай төрөөбүтэ 130 сылынан, Нам талааннаахтарын күүһүнэн үс көстүүлээх «Туналҕаннаах ньуурдаах Туйаарыма Куо» музыкальнай драма-олоҥхо сыанаҕа турбута. Премьерата М.К. Аммосов аатынан Култуура уонна духуобунай сайдыы дыбарыаһыгар  буолбута.

Испэктээк доҕуһуолун Нам улууһун Үөдэйиттэн төрүттээх, саха идэтийбит муусукатыгар улахан кылааттаах, Сергей Зверев-Кыыл Уола үҥкүүлэрин барытын ноталаабыт Василий Зырянов суруйбут.

Бу олоҥхо-драма бырайыагын ааптара — СӨ искусстволарын үтүөлээх диэйэтэлэ, Үҥкүү национальнай тыйаатырын сүрүн дирижера Николай Петров. Испэктээк сүрүн режиссера – алгысчыт Афанасий Федоров, иккис режиссер – Опера тыйаатырын режиссера Прокопий Неустроев, сүрүн худуоһунньук – Намтан төрүттээх, Арассыыйа уонна Саха Сирин ускуустубаларын үтүөлээх диэйэтэлэ, Нуучча тыйаатырын кылаабынай худуоһунньуга Николай Попов, көстүүм худуоһунньуга – Марианна Оконешникова, сүрүн хореограф-балетмейстер – Мария Сайдыкулова.

Нам улууһун 11 нэһилиэгиттэн кыттыылаах, аҥаардас аркыастырга 50-ча муусуканнаах «Туйаарыма Куо» олоҥхо-драманы көрүҥ.