Мобильнай сыһыарыы сүрэхтэннэ

М.К. Аммосов аатынан ХИФУ Олоҥхону чинчийэр үнүстүүтэ «НОО! – олоҥхону олоҕурбут ньыманан толоруу холобурдара» мобильнай сыһыарыыны сүрэхтээтэ.

Бу сыһыарыы саха улуу олоҥхотун тыыннаах дорҕооннорун киэҥ эйгэҕэ таһаарар, тарҕатар аналлаах оҥоһулунна.

Барыта 33 олоҥхоһут 117 олоҥхотун ырыата уонна 56 олоҥхолорун сэһэнэ киирдэ. Ол иһигэр 120 сыл анараа өттүнээҕи, 1902, 1903 сыллардааҕы, сэдэх аудио-устуулар бааллар: Иван Петров «Оҕо Тулаайах» уонна Федор Винокуров «Эр Соҕотох» диэн Орто Халымаҕа уһуллубут олоҥхолоруттан быһа тардыыларыгар тиийэ истиэххэ сөп.

Электроннай сыһыарыы сүрүн соругунан олоҥхо сэһэнин уонна ырыатын-тойугун эгэлгэтин, уратытын арыйыы буолар. Олоҥхону сэҥээрэр, үөрэтэр, чинчийэр, олоҥхолуурга холонор дьоҥҥо-сэргэҕэ туһуланар.