“Куйуур олоҥхото-2024” кыайыылааҕа – Гаврил Менкяров

ХИФУ бэрэпиэссэрэ Галина Попова-Санаайа бырайыагынан ыытыллар “Куйуур олоҥхото” күөн күрэс быйыл Мэҥэ Хаҥалас улууһун I Тыыллыма нэһилиэгэр буолла.

18-35 диэри саастаах 12 толорооччу, араас улуустан тоҕуоруһа мустан, икки күн устата олоҥхолоон иһитиннэрдэ. Түмүккэ “Кылаан чыпчаал” үрдүк аатын Олоҥхо тыйаатырын артыыһа Гаврил Мэҥкээрэп ылла. Киниэхэ 80 тыһыынча солкуобай суумалаах сэртипикээт туттарылынна.

Санатан эттэххэ, былырыын Уус Алдан улууһун Өлтөх нэһилиэгэр Таатта Баайаҕатыттан  Арчыман Номоҕон  кыайбыта.

Олоҥхо тыыныгар иитиллибит ыччаппыт, култуурабыт үйэлээх баайын кэлэр көлүөнэлэргэ тиэрдэр эдэр дьоммут, Лүкээриги эбэҕэ куйуурга кыттыһан, өттүк харалаах дьиэлээтилэр.