Оҕолорго олоҥхону билиһиннэрдэ

Оҕо ааҕар киинигэр Олоҥхо тыйаатырын артыыһа Василина Баланова кырачааннарга олоҥхо туһунан кэпсээтэ, тутулун, сүрүн идиэйэтин, ис хоһоонун, суолтатын, дьоруойдарын туһунан оҕоҕо олус тиийимтиэтик быһааран биэрдэ.

Кини төрөөбүт тыл киһиэхэ оруолун, сабыдыалын, кэскилин туһунан санааларын үллэһиннэ. Тылын билбэт киһи хайдах буоларын холобурдарга тирэҕирэн өйдөттө. Сахалыы саҥара сатыылларыгар уонна Олоҥхо тыйаатырын туруорууларыгар сылдьалларыгар ыҥырда.

Көрсүһүү түмүгэр олоҥхо сүрүн дьоруойдарын ырыаларын арааст куолаһынан ыллаан иһитиннэрдэ. Итиэннэ кылыһах таһаарыыга маастар-кылаас уонна дорҕоонноохтук сөпкө саҥарарга эрчиллиилэри оҥоттордо.