Станислав Иванов олоҥхо сайда, эйгэтэ кэҥии турарыгар үгүс үлэни ыытар

Майа сэлиэнньэтин  өрөспүүбүлүкэҕэ биллэр, аатырар Д.Ф.Ходулов аатынан норуодунай тыйаатыра быйылгы 60-с сезонун Станислав Иванов “Хорсун-хоодуот Хатан Боотур” олоҥхо-испэктээгинэн түмүктээбитэ.

 06.05.24 15:07

Онуоха махтал бастыҥа туруорааччы режиссерга Данил Осиповка ананар, туруоруу көрөөччүнү умсугутта, уобарастары арыйыы чаҕылхай. Тыйаатыр бары артыыһа, үлэһитэ түмсүүлээх, талааннаах кэлэктиип буоларын көрдөрдө, ону таһынан олоҥхону өрө тутар, айар үлэлэринэн биллэр улууһун эдэр дьонун В.Никифоровы, У.Ефремованы, В.Кривошапкинаны, о.д.а. кытыннарбыттара хайҕаллаах эрэ. Д.Ф.Ходулов аатынан култуура дьиэтин улахан саалатыгар дьон-сэргэ, оҕо аймах тоҕуоруһа мустубута олус үөрдэр. Үтүмэн үйэлэри уҥуордаан, норуот барҕа баайа буолан харыстанан, көлүөнэттэн көлүөнэҕэ тиэрдиллэн кэлбит олоҥхобутугар сүгүрүйүүбүт буолар диибит. Бу утум салҕаныытын бэлиэтэ.

XXI үйэҕэ олоҥхобут тарҕана, өй-санаа илдьитэ буола туруутугар аны ыччат дьоммут кылааттарын киллэрэллэр. Ол иһигэр Станислав Иванов Алдан улууһун Олоҥхо Ыһыаҕар «Хара буурай аттаах Хорсун Хоодуот Хатан Боотур» олоҥхо айымньытын толорон, өрөгөй үөрүүнү, киэн туттууну бэлэхтээбитэ. Бу сыллар тухары кини тупсар, чочуллар, байар. Станислав Иванов саха олоҥхото үйэтитиллэ, сайда, эйгэтэ кэҥии турарыгар үгүс үлэни ыытар. Тус салайар эппиэттээх үлэтин таһынан, өрөспүүбүлүкэ уонна кини тас өттүгэр олоҥхо үгүс тэрээһинигэр, күөн күрэһигэр тиһигин быспакка кыттар, сылтан сыл толорор репертуарын хаҥатар, бэйэтин тула ыччаты түмэ сылдьар биир тумус туттар ыччаппыт буолар. Киниэхэ үтүө-бэлиэ күнүнэн олоҥхо бухатыырыныы чэгиэн-чэбдик туругу, айымньылаах ахсым айаны, айыы аймаҕын туллубат тулааһына буолан, махталы, тапталы ыла турарыгар баҕарабыт.

Ульяна Флегонтова,

Олоҥхо киинэ, Дьокуускай.