Мэҥэҕэ Олоҥхо дьиэтигэр…
Мэҥэ Хаҥалас улууһун Аллараа Бэстээх бөһүөлэгэр култуура киинин үлэтин билсэ тиийэ сылдьан, Гавриил Колесов аатынан Олоҥхо дьиэтигэр ыалдьыттаан аастым.
Бу күннэргэ Олоҥхо дьиэтигэр улуустааҕы «Мэҥэ Сыахай» кукольниктар түмсүүлэрин салайааччыта, СӨ уус-уран оҥоһуктарын маастара Лидия Михайловна Николаева «Сайылык» композицияларын быыстапкатын сэргии көрдүм.
Улуус «Мэңэ Сыахай» кукольниктарын түмсүүтэ сыл аайы саңаттан саңа бырайыактары толкуйдаан олоххо киллэрэллэр. Айар талааннаахтарбыт «Оҕо сааһым одуулуур», «Байанай», «Ыһыах» уус-уран быыстапкаларын бар дьоңңо көрдөрүүгэ туруорбуттар, бу бырайыактар өрөспүүбүлүкэ таһымнаах киэң түһүлгэлэргэ кыайыылаах буолбуттара.
Айар талааннаах кукольниктар үксүлэрэ учуутал идэлээх буоланнар, хас биирдии оңорор бырайыактарыгар оҕо аймах болҕомтотун тардар эрэ буолбакка, саха норуотун олоҕун укулаатын, өбүгэлэрбит төрүт үгэстэрин, сиэрдэрин-туомнарын, туттар малларын-салларын, таңастарын-саптарын көрдөрөр гына толкуйдаан, уустаан-ураннаан киһи эрэ кэрэхсиир улахан үлэлэрин оңорон олоххо киллэрэллэр.
Уус-уран быыстапка оҕолор кэрэхсииллэрин гына сайылыкка олорор Кэнчээри уол кэпсээнинэн ыытыллар, куукуланы Аллараа Бэстээх 2-с нүөмэрдээх орто оскуолатын 5 кылааһын үөрэнээччитэ Ярослав Игнатьев саҥарта, экскурсиябыт улахан күөх экранҥа сахалыы ойуулуктары көрдөрүүнэн түмүктэнэр. Быыстапка алтынньы ый 15 күнүгэр дылы көрөөччүлэрин ыҥырар.