«Ыалга олоҥхолооһун» бырайыак чэрчитинэн

Таатта Уолбатын олохтоохторо Виктория Всеволодовна уонна Иннокентий Трофимович Боппосовтар тиэргэннэригэр туттубут балаҕаннарыгар “ОЛОҤХО АЛЫПТААХ ЭЙГЭТЭ” диэн дьоро киэһэ буолан ааста.

Олоҥхону куолаан толорор “Удьурҕай” бөлөҕү тэрийбит, омук сирдэринэн фестивалларга, куонкурустарга кыттыбыт, 2014 с. Хаҥаласка ыытыллыбыт Олоҥхо ыһыаҕар “Дьулуруйар Ньургун Боотур” олоҥхоттон Кыыс Ньургун тойугунан өрөспүүбүлүкэҕэ Гран При буолбут, “Күлкүл бөҕө оҕонньор икки Силлирикээн эмээхсин икки” олоҥхонон Кыыл Уолун үбүлүөйдээх ыһыаҕар Сунтаарга Сергей Зверев аатынан анал ааты ылбыт, Ийэ олоҥхоһут Көһөҥө Бүөтүр стипендиата, СӨ үөрэҕириитин уонна култууратын туйгуна Раиса Маркова “Ыалга олоҥхолооһун” бырайыак чэрчитинэн күндү ыалдьыт буолла, олоҥхолоон иһитиннэрдэ.

Быйыл төрөөбүтэ 160 сылын туолбут биир дойдулаахтара, олоҥхоһут, норуот ырыаһыта. чинчийээччи, этнограф, үөрэхтээх саха дьахтара М.Н. Андросова-Ионова “Үүт Аас бэйэлээх Үрүҥ Айыы тойон ыччаттара” олоҥхотуттан быһа тардыыны кыра оҕолор уонна “Дьэ-буо” бөлөх толорон иһитиннэрдилэр.

Василина Рахлеева

Ньургуйаана Рахлеева

Устя Лазерева, 6 кылаас

Иннокентий Трофимович көмүлүөгүн сотору-сотору күөдьүтэн биэрэн, мас быраҕан, сып-сылааска олорон, олоҥхону иһиттилэр. Бу балаҕаҥҥа нэһилиэк тэрээһинэ хаһыс да сырыытын ыытылынна. Ыалдьытымсах ыалга махтал буолуохтун!