“Кыыс Ньургун” олоҥхо-испэктээги көрөөччү биһирээтэ

Ахсынньы 16 күнүгэр Мүрү нэһилиэгин Күлүмнүүр аатынан Култуура дыбарыаһыгар Роман Алексеев-Бөҕө Арамаана “Алаатыыр Ала Туйгун” олоҥхотун бастакы үйэтин — “Кыыс Ньургун” олоҥхо-испэктээги — Бороҕон талааннаах дьоно оонньоон көрдөрдүлэр.

Билэрбит курдук, “Алаатыыр Ала Туйгун” кээмэйинэн саамай уһун олоҥхо буолар: 50 тыһыынчаттан тахса хоһоонунан устуруокалаах.

Олоҥхонон дьүһүйүүбүт 1 чаас 20 мүнүүтэлээх буолла. Манна барыта сүүсчэкэ киһи кыттыыны ылла. Туруорааччы режиссер — биир дойдулаахпыт Роман Атласов.

Сүрүн оруолларга:
Кыыс Ньургун бухатыыр – Алена Давыдова;
Оҕо Очуостаан – Юрий Стручков;
Хаадыат Мохсоҕол – Айаал Вырдылин;
Кыыс Ньургун ийэтэ – Анна Федорова;
Кыыс Ньургун аҕата – Александр Бурцев;
Чугдаарыкы Тойон – Александр Гоголев;
Айыы Нэлбигий удаҕан – Марфа Алексеева;
Сорук Боллур – Айсен Старков;
Бухатыырдар Тойонноро- Иван Тордуянов;
Күөнтэ Хара бухатыыр – Василий Черкашин;
Хамсык Хара удаҕан – Лена Жиганюк;
Сиэмэх Дьэгистэй удаҕан – София Сидорова;
Тимир Сигиди бухатыыр – Павел Аммосов.

Испэктээги көрөөччү ылынна, биир тыынынан көрдө. Тойук, үҥкүү, муусука, экраны туһаныы, уот-күөс оонньуута, таҥас-сап, көстүүм испэктээги киэргэппиттэрин бэлиэтээтилэр.

Артыыстар бары да уобарастарын толору арыйдылар, итэҕэтиилээхтик оонньоотулар.

Испэктээк Олоҥхо ыһыаҕын өрөгөй ырыатынан өрө күүрүүлээхтик түмүктэннэ.

Улуустааҕы «Олоҥхо» ассоциациятын бэрэссэдээтэлэ Анатолий Сторожев эҕэрдэлээтэ, Роман Атласовка, Алена Давыдоваҕа, “Олоҥхо дьиэтэ” этнокультурнай кииҥҥэ Махтал суруктары туттарда.

Олоҥхоһут Роман Алексеев сыдьааннара кэлэн, хас биирдии тэрийсибит дьоҥҥо, сүрүн артыыстарга Махтал суруктары, ааптар кинигэлэрин бэлэх ууннулар.

Елизавета Данилова,

“Олоҥхо дьиэтэ” ЭКК уус-уран салайааччыта.