Олоҥхо тургутугун түмүгэ
“Олоҥхо дьыктаана” сырдатар аахсыйа чэрчитинэн быйыл өрөспүүбүлүкэ оскуолаларын V-XI кылаастарыгар тута тургутук, ол эбэтэр онлайн-тест Национальнай бибилэтиэкэ саайтын анал платформатыгар Олоҥхо дэкээдэтин былаһын тухары ыытылынна — сэтинньи 25 күнүттэн ахсынньы 5 күнүгэр диэри.
Тоҕо итиччэ уһуннук барда диэтэргит, онлайн киэбинэн буолан, хоту улуустарга уонна кытыы нэһилиэктэргэ интэриниэт бытаанын, итиэннэ тыһыынчанан киһи тэҥинэн биир кэмҥэ саайка киирэрэ техническэй өттүнэн уустуктардааҕын учуоттаан, итинник толору 10 күннээх болдьоҕу бигэргэппиппит. Онон, чахчыта да, элбэх оҕо кыттарын ситистибит: V-XI кылаастартан барыта 32 тыһыынча кэриҥэ үөрэнээччи тургутугу толордо.
| Дьокуускай куорат оскуолалара | ||
| № | Үөрэх кыһата | Кыттыбыт оҕо ахсаана |
| 1. | Саха политехническай лицей | 1238 |
| 2. | Ф.К. Попов аатынан 20-с №-дээх оскуола | 989 |
| 3. | Айыы кыһата | 664 |
| 4. | 17-с №-дээх оскуола | 505 |
| 5. | А.Г. уонна Н.К. Чиряевтар ааттарынан Национальнай гимназия | 455 |
| 6. | Саха гимназията | 395 |
| 7. | 12-с №-дээх оскуола | 375 |
| 8. | 2-с №-дээх национальнай политехническай оскуола | 369 |
| 9. | Хатас П.Н. уонна Н.Е. Самсоновтар ааттарынан оскуолата | 331 |
| 10. | 1-кы №-дээх оскуола | 296 |
| 11. | Н.И. Шарин аатынан 39-с №-дээх оскуола | 273 |
| 12. | 7-с №-дээх оскуола | 244 |
| 13. | 26-с №-дээх оскуола | 222 |
| 14. | Марха 1-кы №-дээх оскуолата | 157 |
| 15. | Аартыка оскуолата (МАШ) | 121 |
| 16. | В.П. Ларионов аатынан физико-техническай лицей | 117 |
Онтон атын оскуолалар 50 иһинэн. Ол да буоллар, киин куораттар маладьыастар: барыта 7178 оҕо кытынна. “Элбэх буоллахтара дии”, — диэтэргит даҕаны, бээ, элбэх киһини көҕүлээн кытыннарар аҕыйах үөрэнээччилээх оскуоланы салайардааҕар быдан уустук эбээт.
Саамай көхтөөх — Саха политехническай лицей. Бу оскуола саха оҕото бэйэтин төрүт култууратыгар, төрөөбүт тылыгар тирэҕирэн сайдыахтааҕын өрүү дьиҥ дьыалатыгар көрдөрөр. Ону бу да кыайыылара туоһулуур. Ити иһин дириэктэр Надежда Константиновна Тимофееваҕа махтанабыт уонна Добун суругу лицейгэ бу күннэргэ тиксэриэхпит.
20-с оскуола көхтөөхтүк кыттан үөртэ: тыһыынчаны ыла сыыстылар. Айыы кыһата, 17-с №-дээх оскуола уонна А.Г. уонна Н.К. Чиряевтар ааттарынан Национальнай гимназия көрдөрүүлэрэ эмиэ үчүгэй.
Ити табылыыссаҕа киирбит 16 оскуолаҕа барыларыгар Махтал суругу тиэрдиэхпит. Кэлэр сылга өссө көхтөөх буолуохтара диэн эрэнэбит. Быйыл холонон көрүү этэ. Эһиил Туоһу сурукка кыттааччы аата суруллар, баала ыйыллар буолуоҕа. Итиэннэ биирдэ эрэ киирэн толорор гына хааччахтаныа.
| Илин эҥээр, киин уонна Бүлүү бөлөх улуустара | |||
| № | Оройуона | Кыттыбыт оҕотун ахсаана | |
| 1. | Амма | 1294 | |
| 2. | Горнай | 614 | |
| 3. | Үөһээ Бүлүү | 1058 | |
| 4. | Бүлүү | 1706 | |
| 5. | Мэҥэ Хаҥалас | 1877 | |
| 6. | Нам | 1461 | |
| 7. | Ньурба | 1325 | |
| 8. | Сунтаар | 1484 | |
| 9. | Таатта | 1701 | |
| 10. | Уус Алдан | 1152 | |
| 11. | Хаҥалас | 621 | |
| 12. | Чурапчы | 1646 | |
Илин эҥээр, киин уонна Бүлүү бөлөх улуустары ылан көрөр буоллахха, улуус аайы үөрэнэр оҕо ахсаана араас-араас, ол эрээри бары кэриэтэ тыһыынчаны аһардылар, онон быйыл хайа да бөлөххө миэстэ таһаарбаппыт. Эһиил бырыһыанынан суоттаан, бастыҥы быһаарыахпыт.
Ол оннугар үтүмэн оҕону кытыннарбыт оскуолалары бэлиэтиибит: Бүлүү куоратын Г.И. Чиряев аатынан 1-кы №-дээх оскуолата, Тааттатааҕы лицей уонна Ытык Күөл Алампа аатынан 1-кы №-дээх оскуолата, Ньурба А.Н. Чусовской аатынан техническэй лицейэ уонна Ст. Васильев аатынан элбэх хайысхалаах гимназията, Чурапчы С.А. Новгородов аатынан 1-кы №-дээх оскуолата уонна С.К. Макаров аатынан гимназията, Намтан Н.С. Охлопков аатынан улуустааҕы гимназия, Амма В.Г. Короленко аатынан 1-кы №-дээх оскуолата, Сунтаар 1-кы №-дээх оскуолата, Покровскай куорат И.М. Яковлев аатынан 1-кы №-дээх оскуолата, Үөһээ Бүлүү Д.С. Спиридонов аатынан 4-с №-дээх оскуолата, Горнай улууһун Маҕарас Л.Н. Харитонов аатынан оскуолата, Мэҥэ Хаҥаластан Төҥүлү уонна Хара, Уус Алдантан Суотту оскуолалара.
Уопсайынан, өрөспүүбүлүкэ бөһүөлэктэрин үгүс оскуолата 100 % толордо. Аахсыйаны көҕүлээбит учууталларга, дириэктэрдэргэ уонна солбуйааччыларыгар, үөрэх салалтатын исписэлиистэригэр, начаалынньыктарга уонна олоҥхону уһуйааччыларга махтанабыт!
Манна эмиэ быыбарга курдук, улахан оскуолалар кыттыылара элбэҕи биэрэр. Хомойуох иһин, сүүһүнэн үөрэнээччилээх сорох улахан оскуолалар аанньа кыттыбатылар. Холобура, Уус Алдан Мүрү 1-кы уонна 2-с оскуолаларыгар 20-лии эрэ оҕо толордо. Арааһа, биир кылааска оҥорторбуттар быһыылаах. Покровскай 2-с нүөмэрдээх оскуолатыттан – 3, Бэрдьигэстээх улуустааҕы гимназиятыттан – 14, Амма 2-с №-дээх оскуолата – 13, Үөһээ Бүлүү М.Т. Егоров аатынан 2-с оскуолатыттан – 22. Чэ, ити курдук.
| Хотугу уонна Аартыка улуустара | |
| Оройуона | Кыттааччы ахсаана |
| Абый | 133 |
| Аллайыаха | 111 |
| Анаабыр | 285 |
| Булуҥ | 79 |
| Үөһээ Халыма | 16 |
| Үөһээ Дьааҥы | 497 |
| Эдьигээн | 167 |
| Кэбээйи | 679 |
| Муома | 13 |
| Аллараа Халыма | 60 |
| Өймөкөөн | 507 |
| Өлөөн | 85 |
| Орто Халыма | 206 |
| Томпо | 643 |
| Уус Маайа | 212 |
| Усуйаана | 38 |
| Эбээн-Бытантай | 20 |
Хотугу уонна Аартыка улуустарын бөлөхтөрүгэр Томпо бэркэ кытынна. Чуолаан Хаандыга оскуолата, улуустааҕы гимназия уонна Кириэс Халдьаайы. Кэбээйиттэн Мастаах, Кэбээйи уонна Танара, Үөһээ Дьааҥыттан Баатаҕай уонна Табалаах, Анаабыртан Үрүҥ Хайа оскуолалара.
| Нууччалыы эйгэлээх оройуоннар | ||
| Алдан | 292 | |
| Ленскэй | 695 | |
| Мииринэй улууһа | 1491 | |
| Нерюнгри | 1462 | |
| Өлүөхүмэ улууһа | 986 | |
Тута тургутук икки тылынан барбыта. Ол иһин нууччалыы тыллаах оройуоннар олоҥхону төһө билэллэрин эмиэ бэрэбиэркэлэннилэр. Олоҥхо ыһыаҕа буолбут Өлүөхүмэ, Мииринэй уонна быйыл буолар Нерюнгри көхтөөхтүк кытыннылар. Чуолаан Мииринэй 24-с уонна 19-с №-дээх, , Нерюнгри 1-кы уонна 2-с №-дээх оскуолалара.
Ааттаммыт бары оскуолаларга Махтал суруктары бэлэмниэхпит. Билсэр төлөпүөҥҥүт: 89142223579.
Санатан эттэххэ, хас биирдии тургутук 10 боппуруостааҕа. Ол аата барытын сөпкө хоруйдаатахха, 10 баалы ылаҕын. Статистика көрдөрөрүнэн, орто баал өрөспүүбүлүкэ үрдүнэн – 6, 3. Ыйытыылар олоҥхо туһунан туох өйдөбүллээхтэрин бэрэбиэркэлиир, тэҥинэн билбэт дьоҥҥо билиһиннэрэр сыаллаах оҥоһуллубуттара.
Онон олоҥхо туһунан билиини тургутарга бэртээхэй бырайыакка кыттыбыккытынан эҕэрдэлиибит уонна махтанабыт!