«Олоҥхо диэни бу кэннэ өссө күүскэ таптаатым!»

Ахсынньы 7 күнүгэр Ньурбатааҕы драмтеатр уораҕайыгар Ньурба улууһун култууратын биир чаҕылхай көстүүтэ дьон-сэргэ дьүүлүгэр таҕыста. С.С.Егоров – Оһоокой Сэмэн «Күн Тэгиэримэн Бухатыыр» олоҥхотун 17 диэри саастаах оҕолор оонньоон көрдөрдүлэр.

Бу диэн эттэххэ, эдэр артыыстар сорохторо сыанаҕа тахса илик, сорохторо фольклорнай куруһуоктарга дьарыктанар оҕолор. Олоҥхо курдук сүдү айымньыны тилиннэрэн, сыанаҕа көрдөрүү, ону ааһан көрөөччүгэ итэҕэтиилээхтик тиэрдии бэркэ тыбыллыбыт. Хас биирдии уобарас ымпыгар-чымпыгар тиийэ толкуйдаммыт. Бу, биллэн турар, айар састаап күүстээх үлэтин түмүгэ буолар.

Бырайыак ааптара СӨ култууратын үтүөлээх үлэһитэ, Аан Дархан этээччи Розалия Тихонова.

— Биһиги Олоҥхо дьиэлэрин ситимигэр киириэхпититтэн бу иккис туруоруубут буолар. Былырыын «Оҕо Дьулаах Бухатыыр» олоҥхону туруорбуппут. Оһоокой Сэмэн «Күн Тэгиэримэн Бухатыыр» олоҥхотун сыанаҕа туруорар мин уруккуттан баҕа санаам этэ. Бэйэм эдэр сылдьан бу олоҥхоҕо оонньообутум, абааһы кыыһын оруолун толорбутум.

Балаҕан ыйыгар артыыс оҕолорбутун сүүмэрдиир кастинг ыыппыппыт, онно хаһан даҕаны ыллаабатах, туойбатах, ол эрээри олоҥхоҕо интэриэстээх оҕолор кэлбиттэрэ. Бу икки ый устата отой биллэ тубустулар. Сценарийын РФ култууратын үтүөлээх үлэһитэ Афанасий Федоров суруйда.

Оҕолорбут көстүүмнэриттэн наһаа астыннылар, харахтара уоттана түспүтэ, тута уобарастырыгар киирэн, сирэйдиин-харахтыын уларыйан хаалбыттарын бэлиэтии көрбүппүт. Онон бу бырайыакка кыттыспыттарын үрдүк ситиһии, дьол курдук ылыммыттарыттан мин наһаа астынабын. Оҕолор куоластарын туруорууга, сөпкө тойугу таһаарарга ньурбалар киэн туттар тойуксуппут Анна Матвеева курдук ааттаах-суоллаах дьону ыҥыран үөрэттэрбиппит тута харахха быраҕыллар. Эһиил култуура департаменын иһинэн Олоҥхо оскуолатын арыйыахтаахпыт, онно бу оҕолорбут бастакы хараҥаччылар буолуохтара. Инникитин үйэ-саас тухары бу бырайыакка кыттыбыттарын өйдүү-саныы сылдьыахтара диэн эрэнэбин.

Туруорааччы режиссер – СӨ култууратын туйгуна Розалия Тартакынова, киниэхэ сүбэтинэн-аматынан Ньурбаҕа кэлэн күүс-көмө буолла СӨ искусствотын үтүөлээх диэйэтэлэ Александр Титигиров, режиссер көмөлөһөөччүтэ эдэр кэскиллээх Ньургуйаана Хахырова. Розалия Васильевна оҕолору кытары үлэлиир талааннаах режиссер буоларын бу туроруутунан өссө биирдэ бигэргэттэ.

Ньургун Анисимов,  Күн Тэгиэримэн Бухатыыр:

— Ньурба 2-с нүөмэрдээх орто оскуолатын Х кылааһыгар үөрэнэбин. Олоҥхону кыра эрдэхпиттэн үөрэтэбин. Күндээдэ Араҥастааҕар кыра кылааска үөрэммитим, учууталым Анна Васильевна олоҥхоҕо интэриэһи, тапталы иҥэрбитэ. Салгыы үрдүкү кылааска тахсан баран олоҥхо араас тиэмэтигэр НПК-ларга кыттан саҕалаабытым. Олоҥхоҕо кастинг буолар диэни доҕорум ийэтиттэн истибитим уонна иккиэн барарга санаммыппыт. Бу бырайыакка киирэн, элбэх саҥаны биллим олоҥхо туһунан, улахан үлэни аастыбыт. Уһуйааччыларбытыгар махтаныам этэ түгэнинэн туһанан. Бу иннинэ Далан «Тулаайах оҕо» айымньытынан спектакль туруорбуппут, онно Ойуун оруолун толорбутум.

Күннэй Петрова – Кыыс Кыскыйдаан Куо:

— Ньурбатааҕы элбэх хайысхалаах гимназия Х кылааһыгар үөрэнэбин. Олоҥхоҕо кастинг буолар эбит диэн эбээм эппитэ. Көннөрү холонон көрөргө санаммытым. Кастинг кэнниттэн «Абааһы кыыһа буолаҕын» диэбиттэригэр бастаан аккаастаммытым. Онтон биир саамай ыарахан уонна чаҕылхай уобарас диэн быһааран биэрбиттэрэ. Билигин, хата, наһаа астына сылдьабын, оруолбун сөбүлээтим. Кырдьык, ыарахан уонна чаҕылхай эбит. Бары олус доҕордостубут, бэйэ-бэйэбитин кытары билистибит. Бары биир сыаллаах-соруктаах үлэлии сылдьар буоламмыт биир дьиэ кэргэн курдук буоллубут. Бука бары биһигини кытары үлэлэспит учууталларбытыгар умнуллубат күннэри бэлэхтээбиккитигэр махтанабыт!

Таня Иванова – Илбис Кыыһа:

— Икки ыйы быһа бэлэмнэммит буолан, улуханнык долгуйбатым. Үөһээ дойдуттан орто дойдуга түһэр Илбис кыыһын оруолун толоробун. Манна саамай ыарахана турукка киирии буолар миэхэ. Эрдэ маннык улахан бырайыакка кыттан көрө илик этим, онон сүрдээҕин киэн туттабын уонна астынабын. Хаҥалас оскуолатыгар үөрэнэбин, бэлэмнэниибин көтүппэт буола сатаатым. Күн аайы кэриэтэ сороҕор дьоммутугар хонон, киирэ-тахса сырыттым. Инникитин АГИиК театральнай өттүгэр туттарсыахпын баҕарабын.

Настя Александрова – Дэгэнэ Дугуй Куо

— Ньурбатааҕы элбэх хайысхалаах гимназия Х кылааһыгар үөрэнэбин. Бастаан кастиҥҥа кэлэрбэр тута абааһы кыыһын оруолун биэрэллэрэ буолуо диэн испэр билэ сылдьыбытым, уобараспын эмиэ оннук тиэрдибитим. Дьүөгэлэрим эмиэ оруолга олус сөп түбэһэҕин дииллэрэ. Көстүүмүм наһаа үчүгэй, саамай өр миэнэ тигиллибитэ, онон сыанаҕа тахсыам биир күн иннинэ эрэ көрбүтүм. Хайдах эрэ боростуой соҕус буолуо дии саныыр этим, онтон көрөн баран харахпын тиэрэ көрдүм, оннук үчүгэй! Бу олоҥхо кэнниттэн инникитин олохпун сыананы, тыйаатыры кытары ситимнииргэ бигэ быһаарыныы ылынным.

Гена Филиппов – Бойбоҥсо оҕонньор:

— Ньурбатааҕы 3-с нүөмэрдээх оскуола III кылааһыгар үөрэнэбин. Бэйэм искусство оскуолатыгар фольклор кылааһыгар дьарыктанабын. Мин видеобын учууталларым ыыппыттара кастиҥҥа кыттарга, онно оруолга талбыттар этэ. Бэйэм сыанаҕа сылдьарбын сөбүлүүбүн. Олоҥхо диэни бу кэннэ өссө күүскэ таптаатым!

Аҥаардас оҕолор көстүүмнэрэ бэйэтэ туспа искусство көстүүтүн кэриэтэ. Иистэнньэҥ Марина Андреева салалтатынан барыта 40 тахса оҕоҕо көрүөхтэн кэрэ уобарас таҥыллыбыт, ону көрөөччүлэр илэ көрөн эрэ сыаналыах тустааххыт.

Олоҥхо сүрэхтэниитигэр Семен Степанович Егоров сиэнэ, депутаттар Сэбиэттэрин бэрэссэдээтэлэ Нюргуяна Михайлова айар састаапка улахан махталын биллэрдэ уонна сүрүн оруоллары толорбут оҕолорго дьиэ кэргэнин аатыттан кыра өйдөбүнньүк харысхаллары бэлэхтээн оҕолор үөрүүлэрин үксэттэ.

Ньурба улууһа төрүттэммитэ 200 сылын көрсө, Дьокуускайга Үүнэр көлүөнэ тыйаатырыгар ахсынньы 17 күнүгэр олоҥхолорун көрдөрөллөр. Онон Ньурбаттан төрүттээх биир дойдулаахтарбыт хайаан даҕаны сылдьан көрөргүтүгэр, астына-дуоһуйа сынньанаргытыгар ыҥырабыт.

Лена Ивановна Петрова 14.12.24 13:40