Олоҥхо олимпиадата буолла

Бу дьыл олунньу 3 күнүгэр Дьокуускай куоракка Төрөөбүт тыл декадатын чэрчитинэн “Айыы Кыһата” национальнай гимназияҕа бэһис төгүлүн куораттааҕы Олоҥхо олимпиадата буолан ааста.

Олимпиаданы, 2019 сылтан Дьокуускай куорат Үөрэҕин дьаһалтатын уонна куорат саха тылын учууталларын методическай холбоһугун «Тыыннаах тыл» бырайыагын чэрчитинэн, резолюция ылынан, Айыы Кыһатыгар, Былатыан Ойуунускай аатынан «Олоҥхо» түһүлгэтэ диэн ааттаан, V кылаастан Х кылааска диэри үөрэнэр куорат оҕолоругар анаан, сахалыы эйгэни тэрийэр сыаллаах ыыппыппыт.

Оскуолаҕа сыл аайы оҕолор иккилии олоҥхону ааҕаллар, үөрэтэллэр. Оҕо олоҥхону аахтаҕына, кэрэтик саҥарарга, олоҥхо тылын өйдөөтөҕүнэ, мындырдаан толкуйдуурга, ис хоһоонун биллэҕинэ, сөптөөхтүк дьаһанан олорорго үөрэнэр, саха буолан килбэйэр диэн баҕа санаанан салайтаран, олоҥхо олимпиадатын суолун тэлбиппит.

Быйыл олимпиадабытыгар 126 оҕо — Саха политехничскай лиссиэйтэн, Национальнай гимназияттан, Саха гимназиятыттан, «Айыы Кыһата» оскуолаттан, 17-с, 26-с, 33-с, 1-кы, 1-с, 38-с, 31-с, 2-с нүөмэрдээх куорат оскуолаларыттан кэлэн, тургутууну аастылар. Онон сыл аайы Олоҥхо олимпиадатыгар кыттар оҕо ахсаана элбии турар.

Олимпиада оҕо сахалыы ыраастык саҥарар дьоҕурун сайыннарарын таһынан, олоҥхону салгыы ааҕарыгар, толору өйдүүрүгэр, чинчийэригэр олук уурар, саҥа эбии билиини арыйарыгар көҕүлүүр.

Олоҥхо олимпиадатыгар көхтөөхтүк кыттыбыт бары үөрэнээччилэри уонна учууталлары эҕэрдэлиибит. Олоҥхону билэр, ааҕар, ырытар дьоҕургут салҕыы сайда турдун! Тэрээһиммитигэр көмөлөспүт оскуолабыт администрациятыгар, учууталларыгар махтанабыт.

Липатова С.А., «Тыыннаах тыл» бырайыак
«Олоҥхо» түһүлгэтин салайааччыта.
03.02.2025