Сииттэҕэ Олоҥхо ыһыаҕар бэлэмнэнии сүбэ мунньаҕа буолла

Сииттэ нэһилиэгэр олохтоох дьаһалта баһылыга Семен Тимофеев, дьаһалта үлэһиттэрэ, ону кытта тэрилтэ, түөлбэ салайааччылара, олохтоох нэһилиэк депутаттара, түмсүү салайааччылара кыттыылаах кэлэр сылга Кэбээйибит улууһугар Олоҥхо ыһыаҕар уонна Кыайыы 80 сылыгар аналлаах сүбэ мунньаҕа буолан ааста.

Олоҥхо ыһыаҕар хас биирдии нэһилиэктэргэ 300 олбоҕу, 100 чаппарааҕы тигэн бэлэмниирбитигэр, былырыын улуустан дьаһал ылан олоробут. Бу улахан үлэлэр, хамсааһыннар быйылгы сылы көтүппэккэ саҕалыырбыт хайаан да наадалааҕын ыйдылар.

Олохтоох дьаһалта быһаарыытынан, бу сылга «Алаһа» эбэлэр түмсүүлэригэ, сахалыы соннору, ону кытта 4 кыыска, 4 уолга сахалыы таҥастары тиктэрэргэ диэн былааннаатылар. Бу ииһи-күүһү барытын бэйэбит кыыспыт Тина Хатылыкованы кытта дуогабардаһан, хамсааһын саҕаланыахтаах. Кэлэр ый диэки Тина кэлэн, меркаларын ылаттыахтаах, ол кэннэ иис үлэтэ күүстээхтик саҕаланыахтаах. Олбох уонна чаппараах тигиитин тэрилтэнэн, түөлбэнэн үллэстэн тигэргэ сүбэлэстибит. Аҕа сүбэтэ уһанар уолаттары, эр дьону түмүөхтээх.

Маны таһынан Сииттэбит сиригэр Үйэтитии сыла биллэриллибитинэн, үйэтитии үлэлэрэ киэҥ хабааннаахтык ыытыллыахтаахтарын туһунан былааннары, сүбэлэри, этиилэри иһиттибит. Олоҥхо ыһыаҕар уонна Кыайыы 80 сылыгар аналлаах тэрээһиҥҥэ анал хамыыһыйалар тэрилиннилэр. Аны ый аайы туох хамсааһын барбытын, барыахтааҕын туһунан түмсэн, сүбэ мунньаҕын тэрийэргэ диэн уураах ылынныбыт.Онон Сииттэбит олохтоохторун ыҥырыа этибит, ыытыллар бары тэрээһиннэргэ, үлэлэргэ көхтөөх кыттыыны ылыаххыт диэн эрэнэбит.

Марианна Сивцева,

Сииттэ, Кэбээйи