Мээндигилэр олоҥхо моно-испэктээгин сэргээн көрдүлэр
«Соҕотох артыыс театра” диэн бырайыак чэрчитинэн аныгы драматург, Мээндиги нэһилиэгин баһылыга Илья Семенов-Ураанай Уола суруйбут олоҥхо-остуоруйатынан “Харама Боотур уонна Амма Куо” олоҥхо моно-испэктээкилэ буолла.
Моно-испэктээги СӨ үтүөлээх артыыһа, Монголияҕа ыытыллыбыт “Кыайыылаахтар парааттара” диэн моно-испэктээк норуоттар икки ардылраныаҕы бэстибээлигэр “Бастыҥ артыыска” анал аатын ылбыт Софья Сергучева-Баранова толордо.
Олоҥхо сюжетыгар олоҕурбут толоруу Сахабыт сирин саамай кэрэ көстүүлээх, дьэҥкир ыраас уулаах Амма өрүс сирин-уотун харыстыырга ыҥырар, тулалыыр эйгэбит, айгыр-силик айылҕабыт алдьаммакка-кээһэммэккэ, үйэттэн үйэҕэ ыччат дьоммутугар хааларын туһугар хас биирдиибит эппиэтинэстээҕин туһунан сытыы кыһалҕаны көтөҕөр.
Софья Иннокентьевна эргиччи талааннаах артыыс эбит. Ол курдук сценаҕа оонньуурун таһынан уруһуйдуур, быысапканан дьарыгырар норуот маастара буолар. Харама хайатын быысапкалаан анньыбытыгар «Харама» уонна «Амма» диэн тыллар арылыччы тахсан кэлбиттэрин кэпсээтэ.
Бу күн бэйэлэрин эҕэрдэлэрин уонна махтал тылларын «Амма улууһун баһылыгын социальнай боппуруостарга солбуйааччы Ньургуйаана Илларионова, Мээндиги нэһилиэгин баһылыга, олоҥхо-остуоруйа ааптара Илья Семенов, улуус культураҕа уонна норуот айымньытыгар салалтатын исписэлииһэ Иванна Захарова, «Алгыс» СК дириэктэрэ Светлана Попова, нэһилиэк бочуоттаах олохтооҕо Яков Деляев, «Чараҥ» түмсүү чилиэнэ Александра Дуюкова тириэртилэр.
Айымньыны билиһиннэрэр дьоро киэһэҕэ «Харама Боотур уонна Амма Куо» кинигэ иллюстрацияларын уруһуйдаабыт улуус дьаһалтатын исписэлииһэ Петр Романов кыттыыны ылла.
Нэһилиэк олохтоохторо моно-испэктээги сэргээн истэн, дуоһуйан тарҕастылар.
Альбина ФИЛИППОВА, «Амма олоҕо» хаһыат