Биһигини быыһыыр дьоруой, арааһа, олоҥхоҕо эрэ баар…

Валентина Гаврильева — бу Хара нэһилиэгин киһитэ. Олорбут дьиэлэрэ соторутааҥҥа диэри турбута. Улахан дьиэ этэ. Кини, дьиҥинэн, элбэх кинигэни суруйбута. Ол эрээри айымньытын ырытар киһи суоҕунан, биллибэттик уу чуумпутук олорон ааһан испитэ. Ону баара «Уот Дьулустаан» диэн кэпсээнигэр сэрийээл уһуллан, биирдэ биллэн таҕыста. Дьон бу сэрийээли, тоҕо эрэ, сөбүлээбит курдук. Кэмэнтээрий бөҕөтүн хас сиэрийэ ахсын суруйуу бөҕөлөр дииллэр.

Сэрийээллэри кэтэһэн туран көрөөччүм суох да, бу кэлиҥҥини кэлэ-бара көрдүм, иһиттим.

Арааһа, көрөөччүнү барыларын, кыра уол ийэтин олоҥхоҕо кэпсэнэр Уот Дьулустаан диэн бухатыыры көрсөн, эргэ биэрэн, ыарыытыттан босхолуур санаата дьулуура, сүрэҕэр сылаас иэйиини сахтаҕа.  Оҕо ийэтин Ырыачайы үтүөрдүөн баҕата сэрийээл, айымньы сүрүн көрдөрүүтэ, эккирэтиһиитэ. Бу тула Хобороос көрсүһүүтэ, уоруута. Ылдьаана хара санаата уо.д.а. арыллар эбит. Биир өттүнэн былыргы олох, иккис өттүнэн бүгүн да көстөр олох. Туох да уларыйбатах. Үөрэхтэннибит, сайынныбыт дэһэбит да. Бүгүн да Хобороостор, Ылдьааналар баалларын курдук бааллар. Бүгүн да, олоҥхо бухатыыра кэлэн, хараҥа  олохтон быыһыырыгар боростуой киһи баҕарар.

Хонон баран «дорообо» диэбиккэ дылы, Валентина Гаврильевна айымньыта кырдьыбат, классическай айымньыга тэҥнээх эбит. Кини өссө сэбиэскэй кэм үгэннээн турдаҕына суруйбута эбээт.

Ырыачайынан аҥаардас ыарыһах ийэни, арааһа, көрдөрбөтөх. Хайа баҕарар кэм  ыар сүгэһэрин, онтон босхолонор ыра санааны, ити кыра уол курдук бары баҕарабыт. Суох  дьоруойу күүтэбит.

Дьиҥнээхтик биһигини быыһыыр дьоруой, арааһа, олоҥхоҕо эрэ баар.

F.