Олоҥхо дьиэтигэр — толору симэхтээх ат турда

Уус Алдан улууһун «Олоҥхо дьиэтэ» этно-култуурунай киин уораҕайа күнтэн күн киэркэйэр, тупсар. Бу күннэргэ киин дьиэтин иһигэр киириигэ сахалыы толору симэхтээх ат оҥоһуллан турда.

Ол курдук, Уус Алдан улууһун норуотун маастара, оһохчут Гаврил Черноградский – Төлөн саха маанылаах атын чопчу бэйэтин кээмэйинэн чочуйан таһаарда. Бу аты СӨ норуотун маастара Екатерина Бочкарева салайааччылаах «Мүрү оһуора» иистэҥньэҥнэр түмсүүлэрэ уонна СӨ норуотун маастара, көмүс ууһа Прокопий Колодезников сиэдэрэй симэҕинэн тэрийэн, толору симээн кэбистилэр.

Онон Олоҥхо дьиэтигэр кэлбит дьоҥҥо саха маанылаах ата өбүгэбит мындыр, дириҥ толкуйун, сатабылын, дьөһөгөй оҕотугар сүгүрүйэр үгэспитин кэпсии-ипсии көрсүөҕэ.

«Мүрү саһарҕата» хаһыат сонуна