Хатылылар улуустааҕы Олоҥхо ыһыаҕын тэрээһинигэр туруналлар

Нэһилиэкпитигэр биллэр олоҥхоһуттар А.Н. Кривошапкин-Нуора Өлөксөй 155, М.И. Белых-Мэхээчэ 145, Г.Г. Иустинов-Ньоҕойоон уола 125, ыһыах ыһааччы У. Е. Платонова=-Уус Ылдьаана 180 сылларыгар анаммыт  “Хатылы нэһилиэгэ — олоҥхо киэҥ киэлитигэр” диэн тэрээһин буолан ааста.

Быйыл улуустааҕы  Олоҥхо ыһыаҕа  Хатылы нэһилиэгэр ыытылларынан, үбүлүөйдээх олоҥхоһуттарбытын дьоҥҥо — сэргэҕэ,  кэлэр үүнэр ыччакка   билиһиннэрэн сырдатар соруктаах бу тэрээһини ыыттыбыт.

Манна  култуура  управлениетын  начаалынньыга Петр Гуляев уонна Дмитрий Попов салайааччылаах  Олоҥхо киинин үлэһиттэрэ кэлэн сүбэ-ама биэрэн, тус санааларын үллэстибиттэрэ дьаһалбыт таһымын өссө үрдэттэ. Нэһилиэкпит баһылыга Вячеслав Попов  аны сайын ыытыллыахтаах Олоҥхо ыһыаҕын тэрээһинигэр барыбытын түмэн, үлэни-хамнаһы торумнуурга  санаа атастаһан, сыалы-соругу туруорда.

«Ньургуһун» уһуйаан кэлэктиибэ  олоҥхону куолаан толоруулара  дьон биһирэбилин ылла. Бары ытыктыыр киһибит  Мария  Иустинова биһиэхэ элбэҕи кэпсээн, көрдөрөн, олоҥхо  киэҥ киэлитигэр  киирэн, үгүһү билэбит.

Үбүлүөйдээх олоҥхоһуттарбыт олохторун , үлэлэрин туһунан ахтыы оҥорон сырдаппыт   хаан уруу аймахтара – сиэннэрэ, хос сиэннэрэ тус  сыалларын  ситтилэр,  кэрэхсэбиллээх  кэпсээннэринэн  дьону  умсугуттулар.

Үүнэр ыччаты  фольклорга уһуйааччы Анастасия Захарова үөрэппит оҕолоро Нарыйаана Кривошапкина Нуораттан «Хара дьоруо аттаах Хара Ньургун бухатыыр» уонна Кристина Максимова — Белых «Ала Хотоҕой»   олоҥхолоруттан толорон,  мустубут дьону «Ноо!» дэтэн сэҥээриини ыллылар.

Бу күн олоҥхону,   кыратык  да  буоллар,  бары  өйдүүн -санаалыын  ылынан, үгүһү иҥэринэн  тарҕастыбыт. Онон  биир үтүө тэрээһиҥҥэ  кыттыбыт дьоммутугар, куруук алаадьы, саламаат аргыстаах  «Алгыс» эбэлэрбит түмсүүтүгэр,  үйэтитэн  устубут  дьоҥҥо  махталбытын  тиэрдэбит.

Анастасия Захарова, Чурапчы