Ньурбаҕа «Олоҥхо» медиа-киин арылынна
Олунньу 20 күнүгэр улуустааҕы кииннэммит бибилэтиэкэҕэ «Олоҥхо» медиа-киин арылынна.
Үөрүүлээх тэрээһиҥҥэ улуус баһылыга Алексей Иннокентьев, СӨ Бырабыыталыстыбатын бэрэссэдээтэлин солбуйааччыта Георгий Степанов эҕэрдэ тыл эттэ, СӨ култуураны сайыннарыыга сүҥкэн кылаатын иһин Хорулатааҕы «Кэскил» култуурнай киин музыкальнай оформителигэр Сергей Иванович Федоровка «СӨ култууратын туйгуна» бочуоттаах бэлиэни, СӨ култуура уонна духуобунай сайдыы министиэристибэтин Бочуотунай грамотатын Ньурбатааҕы искусство оскуолатын художественнай кылааһын преподавателигэр Василий Николаевич Кылбановка, култуура департаменын сүрүннүүр исписэлииһигэр Марина Руслановна Андрееваҕа үөрүүлээх быһыыга-майгыга туттарда.
АГИКИ доцена, филологическай наука кандидата Ньургун Афанасьев, улуустааҕы Култуура департаменын салайааччыта Розалия Тихонова уо.д.а. кыттыыны ыллылар, медиакиин арыллыбытынан эҕэрдэлээтилэр.
СӨ Национальнай бибилэтиэкэтин салайааччыта Галина Кутугутова куйаар ситимин нөҥүө мустубут дьоҥҥо анаан эҕэрдэ тыл эттэ. Медиа-киин үлэһиттэрэ Артур Кузьмин уонна Игорь Герасимов саҥа технологиянан 3D принтергэ сахалыы чорооннору, кытыйаны, араас оҥоһуктары оҥорон таһаарар буолуохтарын, футболкаҕа ойуу түһэриллэрин билиһиннэрдилэр. Медиа-киин эмблематын оҥорбуттарын көрдөрдүлэр.
Лена Ивановна Петрова,Ньурба