Мэҥэ Хаҥалас Олоҥхотун дьиэтин ситиһиитэ
Узбекистан Хива куоратыгар ыытыллбыт «Бахши» норуоттар икки ардыларынааҕы IV бэстибээлгэ Мэҥэ Хаҥалас улууһун Гаврил Колесов аатынан Олонхо дьиэтин үлэһитэ Анисия Степанова бириистээх III миэстэни ылла.
Анисия эһээтэ Николай Степанов-Ноорой “Күн Эрили” олоҥхотун толорон, аан дойду үс бастыҥ сэһэнньитин иһигэр киирдэ.
Түүр эйгэтин II култуурунай пуорумун чэрчитинэн тэриллибит «Бахши» бэстибээл төрүт култуураны харыстыырга туһуланар. Манна барыта 40-тан тахса дойду сэһэнньитэ араас дойдулартан кэлэн кыттынна. Анисия Арассыыйаттан соҕотох бэрэстэбиитэл буолар. Онон ситиһиитэ икки бүк үөрүүлээх.
Маны таһынан пуорумҥа Г.Г. Колесов аатынан Олонхо дьиэтин дириэктэрэ Евдокия Иванова өрөспүүбүлүкэҕэ олоҥхону сайыннарыыга, тарҕатыыга туох үлэ ыытылларын туһунан дакылаат аахта. Эспиэрдэр уонна истээччилэр матырыйааллар систиэмэлээхтэрин уонна дириҥ ис хоһоонноохторун үрдүктүк сыаналаатылар.
Ону тэҥэ өссө Г.Г. Колесов аатынан Олонхо дьиэтин уонна Юнус Раджаби аатынан Узбек национальнай муусукатын уонна ускуустубатын института бииргэ үлэлииргэ Сөбүлэҥ түһэристилэр. Кыргызстан, Туркменистан уонна Казахстан сэһэнньиттэрин кытта холбоһуктаах бырайыактары олоххо киллэрэр кыахтары дьүүллэстилэр.
«Бахши» бэстибээл быйыл төрдүс төгүлүн ыытылынна. Бэстибээл бастаан Узбекистан бэрэсидьиэнэ Шавкат Мирзиев кыттыылаах Термез куоракка саҕаламмыта, онтон Нукус уонна Гулистан куораттарга салҕаммыта.
Хива куоракка ыытыллыбыт тэрээһиҥҥэ Узбекистан култууратын миниистирэ Озодбек Назарбеков, Азербайджан култууратын миниистирэ Адиль Керимли, ТЮРКСОЙ генеральнай сэкирэтээрэ Султан Раев, Түүр култууратын уонна нэһилиэстибэтин пуондатын бэрэсидьиэнэ Актоты Райымкулов, Түүр Академиятын бэрэсидьиэнэ Шахин Мустафеев, ТЮРКПА генсэкирэтээрэ Мехмет Сюрейор, Кыргызстан култууратын миниистирин солбуйааччыта Гульбара Абдыкалыкова, «Манас» Национальнай академия бэрэсидьиэнэ Азиз Биймырза уулу, «Манас» академия национальнай Сэбиэтин чилиэннэрэ, Кыргыз Өрөспүүбүлүкэтин култууратын диэйэтэлэ Кайрат Иманалиев уонна академик Абдылдажан Акматалиев кыттыыны ыллылар.
СӨ Ил Дарханын уонна бырабыыталыстыбатын пресс-сулууспата