Олоҥхо дойдутун оҕолорун оһуордаах түһүлгэтэ

Сунтаар улууһун оскуолалара Арассыыйаҕа Аҕа дойду, Саха Өрөспүүбүлүкэтигэр Ийэ дойду көмүскээччилэрин сылларынан, Сунтаар улууһугар С.А.Зверев-Кыыл Уола 125 сылыгар, Улуу Кыайыы 80 сыллаах үбүлүөйүгэр аналлаах «Олоҥхо дойдутун оҕолорун оһуордаах түһүлгэтэ» улуустааҕы бэстибээлгэ актыыбынай кыттыыны ылаллар.

Бүлүүчээн, Наахара, Кириэстээх, Аллыҥа, Тойбохой, Арыылаах, Маар Күөл, Дьаархан, Илимниир, Хадан, Тэҥкэ, Бордон оскуолаларын үөрэнээччилэрэ «Олоҥхо дойдутун оҕолорун оһуордаах түһүлгэтэ» улуустааҕы бэстибээлгэ дьоҕурдарын, талааннарын көрдөрдүлэр.

Дьүүллүүр сүбэ састаабыгар иитии уонна эбии үөрэхтээһин отделын сэбиэдиссэйэ Александра Павлова, иитии уонна эбии үөрэхтээһин отделын сүрүннүүр исписэлииһэ Сахаайа Тихонова, Сунтаардааҕы гимназия музыкаҕа, саха тылыгар учуутала Алена Сергеева, Н.М.Родионова аатынан Сунтаардааҕы оҕо дьоҕурун сайыннарар киин педагога Галина Лидочен үлэлээтилэр.

Бэстибээл чэрчитинэн хас биирдии үөрэх тэрилтэтэ Улуу Кыайыыга аналлаах, сэриигэ кыттыбыт биир дойдулаахтарын, буойун учууталларын, сэрии сылларын оҕолорун, тыыл бэтэрээннэрин тустарынан экспозицияларын дьүүллүүр сүбэ сыаналаата.

Быйыл улуус оскуолаларыгар «Учуутал-фронтовиктар», «Өйдөбүл вахтата», «Төрөөбүт төрүт тыл түһүлгэтэ», «Сэрии сылларын оҕолоро» муниципальнай бырайыактар ыытылла тураллар. Үгүс матырыйааллар хомулланнар Аҕа дойду Улуу сэриитин уотун ортотунан ааспыт, тыылга килбиэннээх үлэнэн Кыайыыны уһансыбыт биир дойдулаахтарбыт үтүө ааттарын үйэтитии-ытык иэспит буолар.

Антонина ПРОКОПЬЕВА