Олоҥхо оскуолата

Уус Алдаҥҥа быйыл кулун тутарга олоҥхо оскуолата икки күн устата үлэлээтэ. Үөрэххэ барыта 250 киһи кыттан, олоҥхо туһунан билиитин хаҥатта.

Тэрээһин кыттыылаахтарын – олоҥхону чинчийэр научнай институт үлэһиттэрин, улууспут үөрэҕириитин, култууратын эйгэлэрин үлэһиттэрин, уһуйааччылары, кыраайы үөрэтээччилэри, олоҥхоһуттар сыдьааннарын Павел Окоемов алгыһынан көрүстэ, Олоҥхо дьиэтин үлэһиттэрэ арыылаах алаадьынан, сөрүүн быыппаҕынан айах тутан күндүлээтилэр.

Бастакы күҥҥэ олоҥхону араас өттүттэн чинчийэр, үөрэтэр Олоҥхо институтун научнай сотрудниктара лекциялары аахтылар. Хайысхалара: саха олоҥхотун эйгэтэ, тиһигэ; олоҥхону техническай наука көрүүтүнэн ырытыы; олоҥхо уонна материальнай култуура; саха сылгытын сөпкө өҥүнэн дьүһүннээһин.

Биир сүрүн боппуруоһунан «Олоҥхо энциклопедиятын» бастакы чааһыгар киирэр Уус Алдан улууһун олоҥхоһуттарын чопчулааһын буолла.

Салгыы Олоҥхо институтун сүрүннүүр научнай сотруднига Юрий Борисов бэйэтин “Баһырҕастаах аттаах Баабый Баатыр” олоҥхотун толордо.

Олоҥхо институтун үлэһиттэрэ Олоҥхо дьиэтин баай фондатыгар үлэлээтилэр

Итини таһынан бочуоттаах бэтэрээн педагог, биир дойдулаахпыт Наталья Мордовская “Оҕону олоҥхоҕо уһуйуу үлэтин тэрийии” маастар кылааһын ыытта.

Оттон СӨ Олоҥхо Ассоциациятын бэрэссэдээтэлэ Февронья Шишигина “Үөрэх уонна култуура тэрилтэлэригэр төрүт эйгэни тэрийии” тиэмэҕэ төгүрүк остуол” иилээн-саҕалаан ыытта. Бу тэрээһиҥҥэ эмиэ дириҥ ис хоһоонноох кэпсэтии таҕыста, ону тэҥэ үлэ саҥа ньымаларын туттууга, салгыы сайыннаран үлэлииргэ торумнары оҥордулар.

Ил Дархан Айсен Николаев дьаһалынан “Олоҥхо энциклопедиятын” 1-кы чааһа тахсыытыгар олоҥхоһуттар сыдьааннара, кыраайы үөрэтээччилэр кэлэн, улууспут олоҥхоһуттарын туһунан чопчулаан үлэлэстилэр.

Александра Местникова, «Олоҥхо Дьиэтэ» ЭКК үлэһитэ