Доҕордоһуу болуоссатыгар — олоҥхо эйгэтэ

Креативнай индустрия сайдыытыгар туһуламмыт «Уһук Илиҥҥэ оҥоһулунна» пуорум чэрчитинэн ыам ыйын 31 күнүгэр Доҕордоһуу болуоссатыгар, Олоҥхо тыйаатыра уонна М.К. Аммосов аатынан ХИФУ Култуурунай киинин айар кэлэктиибэ кыттыһан, «Олоҥхо эйгэтин арыйан» испэктээги көрдөрдүлэр.

Испэктээк режиссера —  Олоҥхо тыйаатырын кылаабынай режиссера Роман Дорофеев. Кыттыыны ыллылар — Олоҥхо тыйаатырын ааттаах-суоллаах артыыстара Гаврил Менкяров, Анастасия Алексеева, Наталья Слепцова, Лена Оленова, Павел Колесов.

Испэктээк саҕаланыытыгар күлэ-үөрэ сылдьар ыччаттар көстөллөр. Кинилэртэн биир билиэн-көрүөн баҕалаах кыысчаан эмискэ Олоҥхо дойдутугар баар буолан хаалар…

Испэктээккэ түөрт Айыы Бухатыыра: Хардааччы Бэргэн, Улуу Даарын, Кыыс Дэбилийэ, Дьырыбына Дьырылыатта буолан хараҥа күүстэри охсуһан кыайыылара буолла.

— Былырыын Олоҥхо дэкээдэтин сабыллыытыгар устудьуоннары кытта туруорбуппут. Испэктээк таһырдьа тахсыыта — бу бастакы холонуу. Төһө да тымныы халлаан буоллар, испэктээги  дьон сэргии ылынн., Ол салгыны мин, режиссер киһи, курдаттыы биллим, онтон олуһун астынным, — диэн санаатын үллэһиннэ режиссер Роман Дорофеев. 

Испэктээги араас омук дьоно, оҕолуун, улахан киһилиин,  олох Олоҥхо  эйгэтигэр киирэн хаалбыт курдук буоллулар. Ускуустуба күүһэ диэн, дьэ, оннук эбит!

Елена Потоцкая суруйуута уонна хаартыскаҕа түһэриитэ.