Олоҥхо ыһыаҕа Нерюнгри 50 сылыгар ананар
Олоҥхо ыһыаҕар бэлэмнэнии үлэтэ хайдах баран иһэрин СӨ Бырабыыталыстыбатын бэрэссэдээтэлин солбуйааччы Сергей Местников мунньаҕар кэпсэттилэр.
—Олоҥхо ыһыаҕар диэри ыйтан эрэ ордук кэм хаалла. Тэрээһини үрдүк таһымнаахтык ыытар туһуттан хайысхаларынан эппиэттээх бөлөхтөр бары үлэлэрин күүһүрдэллэрэ наада. Аныгыскы нэдиэлэҕэ Нерюнгрига култуура уонна успуорт хамыыһыйалара кыттыылаах көһө сылдьар мунньаҕы былаанныыбыт, — диэтэ Сергей Местников.
Олоҥхо ыһыаҕа Нерюнгри улууһугар от ыйын 4-5 күннэригэр ыытыллар, Нерюнгри куората тэриллибитэ 50 сылыгар ананар.
Ил Дархан сорудаҕынан тупсарыллар «Амикан» паарка — Олоҥхо ыһыаҕын сүрүн былаһааккатынан буолар. Ыһыахха сиэри-туому, сүрүн тэрээһиннэри, куонкурустары, спортивнай күрэхтэһиилэри ыытарга 16 эбийиэк тутулла турар.
Ыһыах аһыллыытыгар уонна сабыллыытыгар 1,5 тыһыынча киһи кыттыыны ылыаҕа. Кинилэр ортолоругар 250 — судаарыстыбаннай тыйаатырдар артыыстара, култуура уонна ускуустуба үөрэҕин кыһатын устудьуоннара, бастыҥ уус-уран кэлэктииптэр.
Тэрээһин аһыллыытын уонна сабыллыытын сиэригэр-туомугар элбэх национальностаах сир устуоруйатын уонна үгэстэрин билиһиннэриэхтэрэ. Бэлэмнэнии бэс ыйын 24 күнүттэн саҕаланар.
Мунньах түмүгэр Бырабыыталыстыба бэрэссэдээтэлин солбуйааччы эбийиэктэри тутууну уонна сири-уоту тупсарыыны тэтимирдэн биэрэргэ, ыһыах кыттааччыларын уонна ыалдьыттарын олохтуурга эбии миэстэлэри бигэргэтэргэ, бэлэмнэнэр бөлөхтөр барыахтаах кыраапыктарын чуолкайдыырга, ыһыах аһыллыытын уонна сабыллыытын сценарийын сөбүлэһиннэрэргэ сорудахтаата.
Санатан эттэххэ, ыһыах бырагырааматыгар 70-тан тахса тэрээһин баар, онно өрөспүүбүлүкэтээҕи куонкурустар уонна спортивнай күрэхтэһиилэр киирэллэр. Тоҕус хайысханан 47 күөн күрэс ыытыллыаҕа, олоҥхоһуттар, оһуохайдьыттар, хомусчуттар, кылыһах-кырыымпа, «Девэйдэ», уо.д.а. киирэллэр.
Маны таһынан, испэктээктэр көрдөрүллүөхтэрэ, быыстапкалар, күргүөмүнэн хомустааһын, уус-ран кэлэктииптэр кэнсиэртэрэ, күүтэр.
Сиһилии: https://www.sakha.gov.ru/news/5495 көрүөххүтүн сөп.
СӨ Ил Дарханын уонна Бырабыыталыстыбатын пресс-сулууспата