Олоҥхо ыһыаҕа: «Амикан» этнографическай комплекс эбийиэктэрин тутуу тэтимнээх

Бэс ыйын 3 күнүгэр  СӨ Бырабыыталыстыбатын өрөспүүбүлүкэтээҕи Олоҥхо ыһыаҕын тэрийэр хамыыһыйата Нерюнгри куоракка үлэлээтэ.

Күн бастакы аҥаарыгар СӨ Бырабыыталыстыбатын бэрэссэдээтэлин солбуйааччы Сергей Местников салайар хамыыһыйата Таастаах сиригэр «Амикан» этнографическай комплекс тутуутун көрдө-иһиттэ.

Дьэ, ыһыахтыыр сир киэҥэ-куоҥа сөхтөрдө! Турар сирэ кырасыабайа, үрдүгэ, тутуута элбэҕэ — бэйэтэ сүүнэ куорат! Оройуон баһылыга Роман Щегельняк тэрийэр хамыыһыйаҕа тутуу хаамыытын сиһилии билиһиннэрдэ.

Олоҥхо ыһыаҕа быйыл олус улахан үбүлүөйдэргэ ананар. Ол курдук, Улуу Кыайыы 80 сыла, Нерюнгри куората төрүттэммитэ 50 сыла, быйыл Олоҥхо ЮНЕСКО шедеврынан билиниллибитэ 20 сыла. Онон сибээстээн далааһыннаах тэрээһин буолаары турар.

Бүгүҥҥү күҥҥэ тутууга биэс бөдөҥ тэрилтэ үлэлиир. Таатта, Нам, Амма улуустарыттан саҕалаан, Дьааҥыттан тиийэ үлэ биригээдэлэрэ тутуу үлэтин ыыталлар.

«Амикан» этнографическай комплекс бэс ыйын 20 күнүгэр түмүктэнэн, 22 чыыһылаттан Олоҥхо ыһыаҕын аһыллыытын театрализованнай көстүүтүн бэлэмнэниитэ саҕаланыаҕа.

Сырдатта Елена Потоцкая, ааптар түһэриилэрэ.