Биир дьиэ кэргэнтэн үс киһи «Ньургун Боотур» операны толорбута

Артыыс Владимир Заболоцкай Саха сирин биллэр дьонун, П. А. Ойуунускай аатынан музыкальнай-драматическай театр бастыҥ ырыаһыттара Илья Петрович Перевалов (Марк Жирков уонна Генрих Литинскэй «Дьулуруйар Ньургун Боотур» оператыгар бастакынан Ньургун партиятын толорбута)  уонна Анна Петровна Заболоцкая (Марк Жирков уонна Генрих Литинскэй «Дьулуруйар Ньургун Боотур» оператыгар Айыы Умсуур Удаҕан партиятын толорбута) дьиэ кэргэнигэр төрөөбүтэ.

1993 сыллаахха, Былатыан Ойуунускай төрөөбүтэ 100 сылыгар култуура миниистирэ Андрей Борисов «Ньургун Боотур» операны туруорбута. Владимир Заболоцкай киниэхэ: «Аҕам Илья Перевалов ыллаабыт партиятын Ньургун Боотуру толоруохпун баҕарабын», — диэбит. Киһитэ соһуйа истибит, ол эрэн сөбүлэспит.

Онон 1993 сыллаахха «Ньургун Боотур» сүрэхтэниитигэр Иван Степанов Ньургун Боотур партиятын толорбут. Оттон иккискэ Владимир Ильич ыллаабыт. Итинник кини эстрадаттан операҕа кэлбит остуоруйалаах.

@arhiv_nvk_sakha