Олоҥхо ыһыаҕа норуоттары түмэр

Култуура уонна духуобунай сайдыы миниистирэ Афанасий Ноев Олоҥхо ыһыаҕар бэлэмнэнии туһунан санаатын үллэһиннэ:

— От ыйын 3 күнүгэр Олоҥхо ыһыаҕар түһүлгэлэр аһыллыылара уонна олоҥхоһуттар, оһуохайдьыттар, фольклорга кыттар дьон бастакы күрэстэрэ саҕаланаллар. Тимири уһаарыы буолар. Барыта 2 тыһыынчаттан тахса киһи араас улуустан кэлэн, сүүрэ-көтө, бэлэмнэнэ сылдьар.
Сүдү баайбыт — олоҥхобут — тула түмсэрбит курдук барыта бэлэмнэннэ. Олоҥхо күрэһэр 200-чэ олоҥхоһут кэллэ. Ыччаттартан саҕалаан, ытык кырдьаҕастарга тиийэ күрэстэр буолуохтара. Аҕыйах ахсааннаах хотугу норуоттарбыт түһүлгэлэрэ туох да кэрэ көстүүлээх гына оҥоһулунна. Ытык Таастаах сиригэр-уотугар «Амикан» этнокомплекс кылгас кэм иһигэр бары сиэри-туому тутуһан тутулунна.
26 улуустан, Дьокуускай куораттан дэлэгээссийэлэр кэллилэр. 1,5 тыһыынча кэриҥэ киһи аһыллыыга кыттыаҕа. Эбэҥки төрүт сирэ буолан, ытык кырдьаҕастартан көҥүл ылан, алгыс түспүтүн кэннэ, эбэҥки, саха, нуучча норуоттарын доҕордоһон олорууларын, эбэҥки норуотун ньимньакаанын уонна олоҥхону холбоон дьүһүйэн көрдөрүөхтэрэ. Манна Нерюнгри куорат бары кэлэктииптэрэ кыттыстылар. Олоҥхо, Аҕыйах ахсааннаах хотугу норуоттар тыйаатырдарын, Үүнэр көлүөнэ тыйаатырын, Нерюнгритээҕи куукула тыйаатырын артыыстара оонньууллар.
Онон Саха сиригэр олорор норуоттары түмэр, култуураларын сайыннарар, өрөгөйдөөх Олоҥхо ыһыаҕа саҕаланара субу чугаһаата. Нерюнгри ыалдьыттары көрсөргө, ыһыах ыһарга бэлэм.

Кэпсэттэ Ангелина Васильева, ааптар түһэриитэ